跳转到内容

清語老乞大/卷一

添加链接
維基文庫，自由的圖書館
  1. ᠠᠮᠪᠠ ᠠᡤᡝ ᠰᡳ ᠠᡳᠪᡳᠴᡳ ᠵᡳᡥᡝ᠉
  2. ᠪᡳ ᠴᠣᠣᡥᡳᠶᠠᠨ ᠸᠠᠩ ᡤᡳᠩ ᠴᡳ ᠵᡳᡥᡝ᠉
  3. ᡨᡝ ᠠᠪᠰᡳ ᡤᡝᠨᡝᠮᠪᡳ᠉
  4. ᠪᡳ ᡤᡝᠮᡠᠨ ᡥᡝᠴᡝᠨ ᡳ ᠪᠠᡵᡠ ᡤᡝᠨᡝᠮᠪᡳ᠉
  5. ᠰᡳ ᠠᡨᠠᠩᡤᡳ ᠸᠠᠩ ᡤᡳᠩ ᠴᡳ ᠵᡠᡵᠠᡴᠠ᠉
  6. ᠪᡳ ᡝᡵᡝ ᠪᡳᠶᠠ ᡳᠴᡝ ᡩᡝ ᠵᡠᡵᠠᡴᠠ᠉
  7. ᠰᡳ ᡝᡵᡝ ᠪᡳᠶᠠ ᡳᠴᡝ ᡩᡝ ᠵᡠᡵᠠᡶᡳ ᡨᡝ ᡥᠣᠨᡨᠣᡥᠣᠨ ᠪᡳᠶᠠ ᡥᠠᠮᡳᡴᠠ ᠪᡳᠮᡝ ᠠᡳᠨᡠ ᡨᡝᠨᡳ ᡠᠪᠠᡩᡝ ᡳᠰᡳᠨᠵᡳᡥᠠ᠉
  8. ᡝᠮᡠ ᡤᡠᠴᡠ ᡨᡠᡨᠠᡶᡳ ᠵᡳᠮᡝ ᠣᡶᡳ ᠪᡳ ᡝᠯᡥᡝᡧᡝᠮᡝ ᠠᠯᡳᠶᠠᡴᡳᠶᠠᠮᡝ ᠶᠠᠪᡠᡵᡝ ᠵᠠᡴᠠᡩᡝ ᡨᡠᡨᡨᡠ ᠵᡳᠮᡝ ᡤᠣᡳᡩᠠᡥᠠ᠉
  9. ᡨᡝᡵᡝ ᡤᡠᠴᡠ ᡨᡝ ᠠᠮᠴᠠᠮᡝ ᡳᠰᡳᠨᠵᡳᠮᠪᡳᠣ ᠠᡴᡡᠨ᠉
  10. ᡝᡵᡝ ᡠᡨᡥᠠᡳ ᡨᡝᡵᡝ ᡤᡠᠴᡠ ᡳᠨᡠ ᠰᡳᡴ᠋ᠰᡝ ᡨᡝᠨᡳ ᠵᡳᡥᡝ᠉
  11. ᠰᡳ ᠪᠣᡩᠣᠴᡳ ᡝᡵᡝ ᠪᡳᠶᠠᡳ ᠮᠠᠨᠠᠰᡥᡡᠨ ᡤᡝᠮᡠᠨ ᡥᡝᠴᡝᠨ ᡩᡝ ᡳᠰᡳᠨᠠᠮᠪᡳᠣ ᡳᠰᡳᠨᠠᡵᠠᡴᡡᠨ᠉
  12. ᠪᡳ ᠠᡩᠠᡵᠠᠮᡝ ᠪᠠᡥᠠᡶᡳ ᠰᠠᠮᠪᡳ ᠠᠪᡴᠠ ᡤᠣᠰᡳᡶᡳ ᠪᡝᠶᡝ ᡝᠯᡥᡝ ᠣᠴᡳ ᡳᠰᡳᠨᠠᠮᠪᡳ ᡩᡝᡵᡝ᠉
  13. ᠰᡳ ᠴᠣᠣᡥᡳᠶᠠᠨ ᡳ ᠨᡳᠶᠠᠯᠮᠠ ᡴᠠᡳ ᡤᡝᠯᡳ ᠠᡳ ᡧᠣᠯᠣ ᡩᡝ ᠨᡳᡴᠠᠨ ᡳ ᡤᡳᠰᡠᠨ ᠪᡝ ᠮᡠᠵᠠᡴᡡ ᠰᠠᡳᠨ ᡳ ᡨᠠᠴᡳᡥᠠ᠉
  14. ᠪᡳ ᡩᠠᠴᡳ ᠨᡳᡴᠠᠨ ᡳ ᠨᡳᠶᠠᠯᠮᠠ ᡩᡝ ᠪᡳᡨᡥᡝ ᡨᠠᠴᡳᡥᠠ ᠪᡝ ᡩᠠᡥᠠᠮᡝ ᠨᡳᡴᠠᠨ ᡳ ᡤᡳᠰᡠᠨ ᠪᡝ ᠮᠠᠵᡳᡤᡝ ᠪᠠᡥᠠᠨᠠᠮᠪᡳ᠉
  15. ᠰᡳ ᠸᡝᡩᡝ ᠪᡳᡨᡥᡝ ᡨᠠᠴᡳᡥᠠ᠉
  16. ᠪᡳ ᠨᡳᡴᠠᠨ ᡳ ᡨᠠᠴᡳᡴᡡ ᡩᡝ ᠪᡳᡨᡥᡝ ᡨᠠᠴᡳᡥᠠ᠉
  17. ᠰᡳ ᠠᡳ ᠵᡝᡵᡤᡳ ᠪᡳᡨᡥᡝ ᠪᡝ ᡨᠠᠴᡳᡥᠠ᠉
  18. ᠪᡳ ᠯᡝᠣᠯᡝᠨ ᡤᡳᠰᡠᡵᡝᠨ ᠮᡝᠩᡯ ᠠᠵᡳᡤᠠᠨ ᡨᠠᠴᡳᠨ ᡳ ᠪᡳᡨᡥᡝ ᠪᡝ ᡨᠠᠴᡳᡥᠠ᠉
  19. ᠰᡳ ᡳᠨᡝᠩᡤᡳᡩᠠᡵᡳ ᠠᡳᠪᡝ ᡴᡳᠴᡝᠮᠪᡳ᠉
  20. ᡳᠨᡝᠩᡤᡳᡩᠠᡵᡳ ᡤᡝᡵᠰᡳ ᡶᡝᡵᠰᡳ ᡩᡝ ᡳᠯᡳᡶᡳ ᡨᠠᠴᡳᡴᡡ ᡩᡝ ᡤᡝᠨᡝᡶᡳ ᠰᡝᡶᡠ ᡩᡝ ᠪᡳᡨᡥᡝ ᡨᠠᠴᡳᠮᠪᡳ᠉
  21. ᡨᠠᠴᡳᡴᡡ ᠴᡳ ᡶᠠᠴᠠᠮᡝ ᠪᠣᠣᡩᡝ ᠵᡳᡶᡳ ᠪᡠᡩᠠ ᠵᡝᠮᡝ ᠸᠠᠵᡳᡥᠠ ᠮᠠᠩᡤᡳ ᡠᡨᡥᠠᡳ ᡨᠠᠴᡳᡴᡡ ᡩᡝ ᡤᡝᠨᡝᡶᡳ ᠪᡳᡨᡥᡝ ᠠᡵᠠᠮᡝ ᠰᡝᡶᡠᡳ ᠵᡠᠯᡝᡵᡳ ᠪᡳᡨᡥᡝ ᠪᡝ ᡤᡳᠶᠠᠩᠨᠠᠮᠪᡳ᠉
  22. ᠠᡳ ᠪᡳᡨᡥᡝ ᠪᡝ ᡤᡳᠶᠠᠩᠨᠠᠮᠪᡳ᠉
  23. ᠯᡝᠣᠯᡝᠨ ᡤᡳᠰᡠᡵᡝᠨ ᠮᡝᠩᡯ ᠠᠵᡳᡤᠠᠨ ᡨᠠᠴᡳᠨ ᡳ ᠪᡳᡨᡥᡝ ᠪᡝ ᡤᡳᠶᠠᠩᠨᠠᠮᠪᡳ᠉
  24. ᠪᡳᡨᡥᡝ ᡤᡳᠶᠠᠩᠨᠠᠮᡝ ᠸᠠᠵᡳᡶᡳ ᠵᠠᡳ ᠠᡳᠪᡝ ᡴᡳᠴᡝᠮᠪᡳ᠉
  25. ᠶᠠᠮᠵᡳ ᠣᡥᠣ ᠮᠠᠩᡤᡳ ᠰᡝᡶᡠᡳ ᠵᡠᠯᡝᡵᡳ ᠰᡳᠪᡳᠶᠠ ᡨᠠᡨᠠᡶᡳ ᠪᡳᡨᡥᡝ ᡧᡝᠵᡳᠯᡝᠮᠪᡳ ᡧᡝᠵᡳᠯᡝᠮᡝ ᠮᡠᡨᡝᡥᡝᠩᡤᡝ ᠣᠴᡳ ᠰᡝᡶᡠ ᡤᡠᠸᡝᠪᡠᡵᡝ ᠪᡳᡨᡥᡝ ᡝᠮᡴᡝ ᠪᡝ ᠪᡠᠮᠪᡳ ᠠᡳᡴᠠ ᡧᡝᠵᡳᠯᡝᠮᡝ ᠮᡠᡨᡝᡵᠠᡴᡡ ᠣᠴᡳ ᡴᠠᡩᠠᠯᠠᡵᠠ ᡧᡠᠰᠠᡳ ᡨᡝᡵᡝ ᠪᡝ ᡩᡝᡩᡠᠪᡠᡶᡳ ᡳᠯᠠᠨ ᠮᠣᠣ ᡨᠠᠨᡨᠠᠮᠪᡳ᠉
  26. ᠰᡳᠪᡳᠶᠠ ᡨᠠᡨᠠᡶᡳ ᠪᡳᡨᡥᡝ ᡧᡝᠵᡳᠯᡝᡵᡝ ᡤᡠᠸᡝᠪᡠᡵᡝ ᠪᡳᡨᡥᡝ ᠪᡠᡵᡝᠩᡤᡝ ᠠᡩᠠᡵᠠᠮᡝ᠉
  27. ᠨᡳᠶᠠᠯᠮᠠ ᡨᠣᠮᡝ ᡝᠮᡨᡝ ᠴᡠᠰᡝ ᠮᠣᠣᡳ ᡧᡠᠰᡳᡥᡝ ᠸᡝᡳᠯᡝᡶᡳ ᠮᡝᡳᠮᡝᠨᡳ ᡥᠠᠯᠠ ᡤᡝᠪᡠ ᠪᡝ ᠠᡵᠠᡶᡳ ᡝᠮᡠ ᠰᡳᠪᡳᠶᠠᡳ ᡩᠣᠪᡨᠣᠨ ᡩᡝ ᡨᡝᠪᡠᠮᠪᡳ ᡴᠠᡩᠠᠯᠠᡵᠠ ᡧᡠᠰᠠᡳ ᠰᡳᠪᡳᠶᠠᡳ ᡩᠣᠪᡨᠣᠨ ᡤᠠᠵᡳᡶᡳ ᠠᠴᡳᠩᡤᡳᠶᠠᠮᡝ ᡨᡝᡵᡝᡳ ᡩᠣᡵᡤᡳ ᠴᡳ ᡝᠮᡴᡝ ᠪᡝ ᡨᠠᡨᠠᠮᠪᡳ ᡨᠠᡨᠠᡥᠠᠩᡤᡝ ᠸᡝ ᠣᠴᡳ ᡠᡨᡥᠠᡳ ᡧᡝᠵᡳᠯᡝᠪᡠᠮᠪᡳ ᡧᡝᠵᡳᠯᡝᡥᡝᠩᡤᡝ ᠰᠠᡳᠨ ᠣᠴᡳ ᠰᡝᡶᡠ ᡤᡠᠸᡝᠪᡠᡵᡝ ᠪᡳᡨᡥᡝ ᡝᠮᡴᡝ ᠪᡝ ᠪᡠᠮᠪᡳ ᡨᡝᡵᡝ ᡤᡠᠸᡝᠪᡠᡵᡝ ᠪᡳᡨᡥᡝ ᡩᡝ ᡳᠯᠠᠨ ᠮᠣᠣ ᡨᠠᠨᡨᠠᡵᠠ ᠪᡝ ᡤᡠᠸᡝᠪᡠ ᠰᡝᠮᡝ ᠠᡵᠠᠮᠪᡳ ᡤᡝᠯᡳ ᡨᡝᡵᡝᡳ ᠨᡳᠩᡤᡠᡩᡝ ᡨᡝᠮᡤᡝᡨᡠ ᡥᡝᡵᡤᡝᠨ ᠠᡵᠠᠮᠪᡳ ᠠᡳᡴᠠᠪᠠᡩᡝ ᡧᡝᠵᡳᠯᡝᠮᡝ ᠮᡠᡨᡝᡵᠠᡴᡡ ᠣᡥᠣᡩᡝ ᡤᡠᠸᡝᠪᡠᡵᡝ ᠪᡳᡨᡥᡝ ᡨᡠᠴᡳᠪᡠᡶᡳ ᡨᠠᡨᠠᠮᡝ ᠸᠠᠯᡳᠶᠠᡶᡳ ᠨᡝᠨᡝᡥᡝ ᡧᠠᠩᠨᠠᠨ ᠪᡝ ᠸᡝᡳᠯᡝ ᡩᡝ ᡶᠠᠩᡴᠠᠪᡠᠮᡝ ᡨᠠᠨᡨᠠᠪᡠᡵᡝ ᠪᡝ ᡤᡠᠸᡝᠪᡠᠮᠪᡳ ᠠᡳᡴᠠᠪᠠᡩᡝ ᡤᡠᠸᡝᠪᡠᡵᡝ ᠪᡳᡨᡥᡝ ᠠᡴᡡ ᠣᠴᡳ ᡠᡵᡠᠨᠠᡴᡡ ᡳᠯᠠᠨ ᠮᠣᠣ ᡨᠠᠨᡨᠠᠪᡠᡵᡝ ᠪᡝ ᠠᠯᡳᠮᠪᡳ᠉
  28. ᠰᡳ ᡨᡝᡵᡝ ᠨᡳᡴᠠᠨ ᡳ ᠪᡳᡨᡥᡝ ᠪᡝ ᡨᠠᠴᡳᡶᡳ ᠠᡳᠨᠠᠮᠪᡳ᠉
  29. ᠰᡳᠨᡳ ᡥᡝᠨᡩᡠᡵᡝᠩᡤᡝ ᡠᡩᡠ ᡳᠨᡠ ᠰᡝᠴᡳᠪᡝ ᠮᡳᠨᡳ ᡤᡡᠨᡳᠨ ᡩᡝ ᡴᡝᠮᡠᠨᡳ ᠠᡴᡡᠨᠠᡥᠠᡴᡡ ᠠᡩᠠᠯᡳ ᡤᡡᠨᡳᠮᠪᡳ ᡨᡝ ᠪᡳᠴᡳᠪᡝ ᡥᠠᠨ ᠪᡝᡳᠰᡝ ᡩᡠᡳᠨ ᠮᡝᡩᡝᡵᡳ ᠪᡝ ᡠᡥᡝᡵᡳᠯᡝᡶᡳ ᠠᠪᡴᠠᡳ ᡶᡝᠵᡝᡵᡤᡳ ᠪᡝ ᠶᠣᠣᠨᡳ ᡤᡝᠮᡠ ᡴᠠᡩᠠᠯᠠᡥᠠᠪᡳ ᠵᠠᠯᠠᠨ ᡩᡝ ᠨᡳᡴᠠᠨ ᡳ ᡤᡳᠰᡠᠨ ᠪᡝ ᠪᠠᡨᠠᠯᠠᡵᠠ ᠪᠠ ᡠᠮᡝᠰᡳ ᠯᠠᠪᡩᡠ ᠮᡝᠨᡳ ᡝᡵᡝ ᠴᠣᠣᡥᡳᠶᠠᠨ ᡳ ᡤᡳᠰᡠᠨ ᠣᠴᡳ ᡩᠠᠮᡠ ᠴᠣᠣᡥᡳᠶᠠᠨ ᡳ ᠪᠠᡩᡝ ᡨᡝᡳᠯᡝ ᠪᠠᡳᡨᠠᠯᠠᠮᠪᡳ ᡳ ᠵᡳᠣ ᠪᡝ ᡩᡠᠯᡝᠮᡝ ᠨᡳᡴᠠᠨ ᡳ ᠪᠠᡩᡝ ᠵᡳᠴᡳ ᡤᡠᠪᠴᡳ ᠶᠣᠣᠨᡳ ᠨᡳᡴᠠᠨ ᡳ ᡤᡳᠰᡠᠨ ᠣᡶᡳ ᠸᡝ ᠶᠠ ᠠᡳᡴᠠ ᡝᠮᡠ ᡤᡳᠰᡠᠨ ᡶᠣᠨᠵᡳᠮᡝ ᠣᡥᠣᡩᡝ ᠶᠠᠰᠠ ᡤᠠᡩᠠᡥᡠᠨ ᡳ ᠰᠠᠮᡝ ᠵᠠᠪᡠᠮᡝ ᠮᡠᡨᡝᡵᠠᡴᡡ ᠣᠴᡳ ᡤUᠸᠠ ᠨᡳᠶᠠᠯᠮᠠ ᠮᡝᠮᠪᡝ ᠠᡳ ᠨᡳᠶᠠᠯᠮᠠ ᠰᡝᠮᡝ ᡨᡠᠸᠠᠮᠪᡳ᠉
  30. ᠰᡳ ᡝᡵᡝ ᠨᡳᡴᠠᠨ ᡳ ᠪᡳᡨᡥᡝ ᠪᡝ ᡨᠠᠴᡳᡵᡝᠩᡤᡝ ᡝᡳᠴᡳ ᠰᡳᠨᡳ ᠴᡳᡥᠠᡳ ᡨᠠᠴᡳᠮᠪᡳᠣ ᠰᡳᠨᡳ ᠠᠮᠠ ᡝᠨᡳᠶᡝ ᡨᠠᠴᡳ ᠰᡝᠮᠪᡳᠣ᠉
  31. ᠮᡝᠨᡳ ᠠᠮᠠ ᡝᠨᡳᠶᡝ ᡨᠠᠴᡳ ᠰᡝᡥᡝ ᡴᠠᡳ᠉
  32. ᠰᡳᠨᡳ ᡨᠠᠴᡳᡥᠠᠩᡤᡝ ᡠᡩᡠ ᠠᠨᡳᠶᠠ ᠣᡥᠣ᠉
  33. ᠮᡳᠨᡳ ᡨᠠᠴᡳᡥᠠᠩᡤᡝ ᡥᠣᠨᡨᠣᡥᠣᠨ ᠠᠨᡳᠶᠠ ᡶᡠᠨᠴᡝᡥᡝ᠉
  34. ᡤᡝᠮᡠ ᠪᠠᡥᠠᠨᠠᠮᠪᡳᠣ ᠪᠠᡥᠠᠨᠠᡵᠠᡴᡡᠨ᠉
  35. ᡳᠨᡝᠩᡤᡳᡩᠠᡵᡳ ᠨᡳᡴᠠᠨ ᡳ ᠰᡠᠰᠠᡳ ᡝᠮᡤᡳ ᡝᠮᡠ ᠪᠠᡩᡝ ᡨᡝᡶᡳ ᠪᡳᡨᡥᡝ ᡨᠠᠴᡳᡥᠠ ᡨᡠᡵᡤᡠᠨᡩᡝ ᠮᠠᠵᡳᡤᡝ ᠪᠠᡥᠠᠨᠠᠮᠪᡳ᠉
  36. ᠰᡳᠨᡳ ᠰᡝᡶᡠ ᠠᡳᠨᠠᡵᠠ ᠨᡳᠶᠠᠯᠮᠠ᠉
  37. ᠨᡳᡴᠠᠨ ᡳ ᠨᡳᠶᠠᠯᠮᠠ᠉
  38. ᠰᡝ ᡠᡩᡠ ᠣᡥᠣ᠉
  39. ᡤᡡᠰᡳᠨ ᠰᡠᠨᠵᠠ ᠰᡝ ᠣᡥᠣ᠉
  40. ᠰᡳᡨᡥᡡᠮᡝ ᡨᠠᠴᡳᠪᡠᠮᠪᡳᠣ ᠰᡳᡨᡥᡠᠮᡝ ᡨᠠᠴᡳᠪᡠᡵᠠᡴᡡᠨ᠉
  41. ᠮᡝᠨᡳ ᠰᡝᡶᡠ ᡩᠠᠴᡳ ᠨᠣᠮᡥᠣᠨ ᠣᡶᡳ ᡠᠮᡝᠰᡳ ᠰᡳᡨᡥᡡᠮᡝ ᡨᠠᠴᡳᠪᡠᠮᠪᡳ᠉
  42. ᠰᡠᠸᡝᠨᡳ ᡤᡝᡵᡝᠨ ᠰᡠᠰᠠᡳ ᡩᠣᡵᡤᡳ ᡩᡝ ᠨᡳᡴᠠᠨ ᡳ ᠨᡳᠶᠠᠯᠮᠠ ᡠᡩᡠ ᠴᠣᠣᡥᡳᠶᠠᠨ ᡳ ᠨᡳᠶᠠᠯᠮᠠ ᡠᡩᡠ᠉
  43. ᠨᡳᡴᠠᠨ ᠴᠣᠣᡥᡳᠶᠠᠨ ᡨᠣᠪ ᠰᡝᠮᡝ ᡝᠮᡠ ᡩᡠᠯᡳᠨ᠉
  44. ᡨᡝᡵᡝᡳ ᡩᠣᡵᡤᡳ ᡩᡝ ᡳᠨᡠ ᡝᡥᡝ ᠨᡳᠩᡤᡝ ᠪᡳᠣ᠉
  45. ᠠᡳᠨᡠ ᡝᡥᡝ ᠨᡳᠩᡤᡝ ᠠᡴᡡ ᡨᡝᡵᡝ ᡝᡥᡝ ᠨᡳᠩᡤᡝ ᠪᡝ ᡳᠨᡝᠩᡤᡳᡩᠠᡵᡳ ᡩᠠᠯᠠᡥᠠ ᠰᡠᠰᠠᡳ ᠰᡝᡶᡠ ᡩᡝ ᠠᠯᠠᡶᡳ ᡨᠠᠨᡨᠠᠴᡳᠪᡝ ᡠᠮᠠᡳ ᡤᡝᠯᡝᡵᡝ ᠪᡝ ᠰᠠᡵᡴᡠ ᡝᡵᡝᡳ ᡩᠣᡵᡤᡳ ᡩᡝ ᠨᡳᡴᠠᠨ ᡳ ᠵᡠᠰᡝᡳ ᡨᠠᠴᡳᠨ ᡠᠮᡝᠰᡳ ᡝᡥᡝ ᡴᡝᠮᡠᠨᡳ ᠴᠣᠣᡥᡳᠶᠠᠨ ᡳ ᠵᡠᠰᡝ ᠮᠠᠵᡳᡤᡝ ᠨᠣᠮᡥᠣᠨ ᡤᡝᠰᡝ᠉
  46. ᠠᠮᠪᠠ ᠠᡤᡝ ᠰᡳ ᡨᡝ ᠠᠪᠰᡳ ᡤᡝᠨᡝᠮᠪᡳ᠉
  47. ᠪᡳ ᡳᠨᡠ ᡤᡝᠮᡠᠨ ᡥᡝᠴᡝᠨ ᡳ ᠪᠠᡵᡠ ᡤᡝᠨᡝᠮᠪᡳ᠉
  48. ᠰᡳ ᡤᡝᠮᡠᠨ ᡥᡝᠴᡝᠨ ᡳ ᠪᠠᡵᡠ ᡤᡝᠨᡝᠴᡳ ᡨᡝᡨᡝᠨᡩᡝᡵᡝ ᠪᡳ ᠴᠣᠣᡥᡳᠶᠠᠨ ᡳ ᠨᡳᠶᠠᠯᠮᠠ ᠨᡳᡴᠠᠨ ᡳ ᠪᠠᡩᡝ ᡶᡝᠯᡳᠶᡝᠮᡝ ᡠᡵᡝᡥᡝ ᠠᡴᡡ ᠪᡳ ᠰᡳᠨᡳ ᡝᠮᡤᡳ ᡤᡠᠴᡠ ᠠᡵᠠᠮᡝ ᡤᡝᠨᡝᠴᡳ ᠠᠨᡨᠠᡴᠠ᠉
  49. ᡠᡨᡨᡠ ᠣᠴᡳ ᠰᠠᡳᠨ ᡴᠠᡳ ᠮᡠᠰᡝ ᠰᠠᠰᠠᡵᡳ ᠶᠣᡴᡳ ᡩᡝᡵᡝ᠉
  50. ᠠᡤᡝ ᠰᡳᠨᡳ ᡥᠠᠯᠠ ᠠᡳ᠉
  51. ᠮᡳᠨᡳ ᡥᠠᠯᠠ ᠸᠠᠩ᠉
  1. 大阿哥你是從哪裡來的？


此作品在全世界都属于公有领域，因为作者逝世已经超过100年，且作品于1931年1月1日之前出版。

Public domainPublic domainfalsefalse

检索自“https://zh.wikisource.org/w/index.php?title=清語老乞大/卷一&oldid=6759688”