學堂教戲即係孔子教樂啫

學堂教戲即係孔子教樂啫
1908年2月15日

本作品收錄於《嶺南白話雜誌/第二期》

喂喂，你地睇過個班優天影戲唔層亞，都唔錯播，乜野唔錯亞？唔係妖脂扭𢴕唔錯播，如果講妖脂扭𢴕，個哋要睇肖灑湘正得咯。但係肖灑湘，話得咁好，我究竟唔曾睇過；惟是凡有講肖灑湘好個哋人，我見都係下流社會嘅多，唔係幾曉睇戲嘅人只。點解我要話佢唔噲睇戲唎？佢唔層曉個戲字解法，所以我話佢唔噲睇戲啫。今日哋戲，點樣得嚟架？係由古時樂部裏頭，變化出嚟嘅。古時嘅樂，今日邊處重有得傳吖？經幾千年世界，就係有得傳，好似如金石𮈔竹個哋敢嘅音韵，俾就唔聽唎。所以古時嘅樂，奏起上嚟，「辟力僕立、辟力僕立」敢聲嘅，點同得今時哋樂「何尺士工、何尺士工」咁好聽唎。但係古時嘅樂，各人睇得佢好重嘅播。孔子教人，第一件禮，第二件樂；教顏淵又話要「樂則韶舞」；就係佢自己正算囉，都係好大引聽野架，在齊聞韶，三個月都唔知到肉味，你話幾緊要唎，睇得哋樂幾重唎。今日哋人，動不動話做戲係下流人，佢唔知到今日嘅戲子，即係舊時嘅樂官一樣啫。但係敢，唔怪得嘅，試問吓今日哋戲，有邊一班係叫做出色架？有邊一個老官，係曉到做戲即係古時作樂一樣架？唔係一咪做到佢淫，就做到佢肉酸嚟引人係囉，知敢就弊唎，敢就失晒孔子教人學樂嘅本立去唎。孔子論樂，最重在韶，韶係太平嘅樂嚟，我試問吓你地，今日係太平時候唔係唎？如果唔係太平時候，就要思想到點樣正得佢太平唎，敢就咪唱咁多亡國之音正得咯；唔唱咁多亡國之音，就要將現時哋戲本嚟改良正得咯。你唔見古時太師師曠個班人咩？一哋都係有材學嘅人，孔子也層以樂嚟教過佢嘅咯播；個班人一出一處，爲國家無亡所緊嘅，同今日肖灑湘個班等等，同唔同吖？我上先話優天影唔錯者，因係個班人，係學界報界有才學嘅人，能究出嚟做戲，以補救社會及一國，抱孔子韶樂太平嘅希望，與孔教有合，故此將佢嚟講啫。然則舊年本社慈善會，教哋學生出嚟做戲，都唔係冇所本嘅播。本社教戲，即係孔子教樂嘅意思嚟乍。如果敢講，伯爺公都係唔鐘意聽，敢就唔駛講唎。