庸言知旨/序

ᠠᠨ ᡳ ᡤᡳᠰᡠᠨ ᡩᡝ ᠠᠮᡨᠠᠨ ᠪᡝ ᠰᠠᡵᠠ ᠪᡳᡨ᠌ᡥᡝ᠉ 庸言知旨

ᠠᠨ ᡳ ᡤᡳᠰᡠᠨ ᡩᡝ ᠠᠮᡨᠠᠨ ᠪᡝ ᠰᠠᡵᠠ ᠪᡳᡨ᠌ᡥᡝ 庸言知旨 ᡧᡠᡨᡠᠴᡳᠨ 序[註 1] 作者：宗室宜兴

ᠠᠨ ᡳ ᡤᡳᠰᡠᠨ ᡩᡝ ᠠᠮᡨᠠᠨ ᠪᡝ ᠰᠠᡵᠠ ᠪᡳᡨ᠌ᡥᡝ ᡳ ᡧᡠᡨᡠᠴᡳᠨ᠈ ᡤᡠᡵᡠᠨ ᡳ ᡤᡳᠰᡠᠨ ᠰᡝᡵᡝᠩᡤᡝ᠈ ᠮᡠᠰᡝᡳ ᠪᠠ ᡳ ᡤᡳᠰᡠᠨ᠈ ᠠᠪᡴᠠ ᠴᡳ ᠰᠠᠯᡤᠠᠪᡠᡥᠠ ᠮᡠᡩᠠᠨ ᡴᠠᡳ᠈ ᠮᡠᠰᡝᡳ ᠨᡝᠨᡝᡥᡝ ᠵᠠᠯᠠᠨ ᠪᡝ ᡴᡳᠮᠴᡳᠴᡳ᠈ ᠠᠵᡳᡤᠠᠨ ᡶᠣᠨᡩᡝ ᡨᡝᠨᡳ ᡩᡠᡩᡠ ᡩᠠᡩᠠ ᠣᠮᡝ ᠮᡠᡨᡝᠮᡝ ᡨᡝᡵᡝᡳ ᡨᠠᠴᡳᡵᡝᠩᡤᡝ ᡠᡨ᠌ᡥᠠᡳ ᡤᡠᡵᡠᠨ ᡳ ᡤᡳᠰᡠᠨ᠈ ᠠᠩᡤᠠ ᡩᡝ ᡝᡵᡝ ᠸᠠᡴᠠ ᠣᠴᡳ ᡤᡳᠰᡠᡵᡝᠮᡝ ᠮᡠᡨᡝᡵᠠᡴᡡ᠈ ᡧᠠᠨ ᡩᡝ ᡝᡵᡝ ᠸᠠᡴᠠ ᠣᠴᡳ᠈ ᡩᠣᠨᠵᡳᠮᡝ ᠮᡠᡨᡝᡵᠠᡴᡡ᠈ ᠨᡳᡴᠠᠨ ᡤᡳᠰᡠᠨ ᠪᡳᠰᡳᡵᡝ ᠪᡝ ᠣᡵᠣᠨ ᠰᠠᡵᡴᡡ ᠣᡶᡳ᠈ ᡨᡠᡨ᠌ᡨᡠ ᠠᠩᡤᠠ ᠴᡳ ᡨᡠᠴᡳᡴᡝᠩᡤᡝ᠈ ᡳᠨᡳ ᠴᡳᠰᡠᡳ ᡠᡵᡝᠰᡥᡡᠨ ᡝᠮᡠ ᠣᠮᠪᡳ᠈ ᡥᡝᠨᡳ ᡥᠠᠴᡳᡥᡳᠶᠠᡵᠠ ᡨᠠᠴᡳᠪᡠᡵᡝ ᠪᡝ ᠪᠠᡳ᠌ᠪᡠᡵᠠᡴᡡ ᠪᡳᡥᡝ᠈ ᠠᠮᠠᠯᠠ ᡶᡠᡴᠵᡳᠨ ᡩᠣᡵᠣ ᠨᡝᡳ᠌ᡶᡳ ᡤᡝᠮᡠᠨ ᡥᡝᠴᡝᠨ ᡩᡝ ᡩᠣᠰᡳᡴᠠ ᠴᡳ᠈ ᠵᡠᠸᡝ ᡨᠠᠩᡤᡡ ᠠᠨᡳᠶᠠ ᡥᠠᠮᡳᡴᠠ᠈ ᡥᡝᠴᡝᠨ ᡳ ᡩᠣᡵᡤᡳ ᡨᡝᡥᡝ ᡠᡵᠰᡝ ᡳ ᡥᠠᠴᡳᠩᡤᠠ ᠨᡳᡴᠠᠨ ᡤᡳᠰᡠᠨ ᡳ ᡶᡠᠮᡝᡵᡝᠮᡝ ᠴᡠᡵᡤᡳᠨᡩᡠᡵᡝ ᠵᠠᡴᠠᡩᡝ᠈ ᡤᡝᠮᡠ ᠨᡳᡴᠠᡵᠠᠮᡝ ᡨᠠᠴᡳᡥᠠ᠈ ᠠᠵᡳᡤᠠᠨ ᡩᡝ ᠮᠠᠨᠵᡠ ᡤᡳᠰᡠᠨ ᠪᡝ ᡶᠣᠨᠵᡳᠴᡳ᠈ ᠪᡝᠯᡳᠶᡝᡴᡝᠰᠠᡴᠠ᠈ ᠮᡠᡨᡠᡶᡳ ᡨᠠᠴᡳᡵᡝ ᡩᡝ᠈ ᡠᡨ᠌ᡥᠠᡳ ᠮᠠᠨᠵᡠ ᠪᡳᡨ᠌ᡥᡝ ᡩᡝ ᡨᡝᡳ᠌ᠯᡝ ᠠᡴᡩᠠᡥᠠᠪᡳ᠈ ᡩᠠᠮᡠ ᡶᠣᠨᠵᡳᡵᡝ ᠵᠠᠪᡠᡵᡝ ᠪᠠ ᡳ ᡤᡳᠰᡠᠨ ᠪᡝ ᡨᠠᠴᡳᡴᡳᠨᡳ ᠰᡝᠮᠪᡳᠮᡝ᠈ ᠨᡳᡴᠠᠨ ᡤᡳᠰᡠᠨ ᡩᡝ ᠠᠴᠠᠪᡠᠮᡝ ᡠᠪᠠᠯᡳᠶᠠᠮᠪᡠᡥᠠ ᠮᠠᠨᠵᡠ ᠪᡳᡨ᠌ᡥᡝ ᡳ ᡨᠠᠴᡳᠪᡠᠴᡳ᠈ ᡠᡨ᠌ᡥᠠᡳ ᠴᡠ ᡤᡠᡵᡠᠨ ᡳ ᠨᡳᠶᠠᠯᠮᠠ ᡩᡝ ᠴᡳ ᡤᡠᡵᡠᠨ ᡳ ᠯᡝᡠ᠋ᠯᡝᠨ ᡤᡳᠰᡠᡵᡝᠨ ᠪᡝ ᡥᡡᠯᠠᠪᡠᠮᡝ᠈ ᠴᡳ ᡤᡠᡵᡠᠨ ᡳ ᡤᡳᠰᡠᠨ ᠪᡝ ᠪᠠᡥᠠᠨᠠᡴᡳᠨᡳ ᠰᡝᡵᡝ ᠠᡩᠠᠯᡳ ᠪᡝ ᡩᠠᡥᠠᠮᡝ᠈ ᠶᠠᠯᠠ ᠶᠠᠯᠠ ᡳ ᠮᠠᠩᡤᠠ ᠸᠠᡴᠠᡠ᠋᠈ ᡝᡩᡝ ᡤᡳᠰᡠᠨ ᡳ ᠮᡝᠶᡝᠨ ᠪᡝ ᡝᠵᡝᠮᡝ ᠨᡳᠶᡝᠯᡝᠮᡝ᠈ ᠠᠩᡤᠠ ᡧᠠᠨ ᠪᡝ ᡤᡳᡵᡴᡡᡶᡳ ᡠᡵᡝᠪᡠᠮᡝ ᡤᠠᠮᠠᡵᠠᡴᡡ ᠣᠴᡳ᠈ ᠠᠮᡨᠠᠨ ᠵᠣᡵᡳᠨ ᡠᠯᡥᡳᡵᠠᡴᡡ ᡨᠣᡴᡨᠣᡥᠣ ᠪᡝ ᠰᠠᠴᡳ ᠣᠮᠪᡳᡴᠠᡳ᠈ ᡧᠠᠨᠶᠠᠨ ᠪᠣᠨᡳᡠ᠋ ᠠᠨᡳᠶᠠ ᠪᡳ ᠪᠠᡵ ᡴᡠᠯ ᡳ ᡨᡠᡧᠠᠨ ᡩᡝ ᠪᡳᡶᡳ᠈ ᠪᠠᡳ᠌ᡨᠠ ᠠᠯᠪᠠᠨ ᡴᠣᠮᠰᠣ ᠣᡶᡳ᠈ ᡶᡝ ᠠᠰᠠᡵᠠᡥᠠ ᠪᡳᡨ᠌ᡥᡝ ᠪᡝ ᠪᠠᡳ᠌ᠴᠠᠮᡝ ᡨᡠᠸᠠᠴᡳ᠈ ᠮᡳᠨᡳ ᠵᡠᠰᡝ ᡳ ᡶᠣᠨᡩᡝ ᠰᠠᡴᡩᠠᠰᠠ ᡠᠩᡤᠠᡨᠠ ᡩᡝ ᡩᠠᠴᡳᠯᠠᠮᡝ ᡶᠣᠨᠵᡳᡥᠠ᠈ ᠵᠠᡳ ᡩᡝᡵᡤᡳ ᡤᠣᠯᠣᡳ ᡨᡠᡧᠠᠨ ᡩᡝ᠈ ᡩᠠ ᠰᡠᠰᡠ ᡳ ᠨᡳᠶᠠᠯᠮᠠᡳ ᠠᠩᡤᠠ ᠰᡝᠨᠴᡝᡥᡝ ᠴᡳ ᡶᡠᠵᡠᡵᡠᠯᠠᠮᡝ ᡤᠠᡳ᠌ᡥᠠ᠈ ᠪᡠᠶᠠᡵᠠᠮᡝ ᠠᡶᠠᡥᠠ ᡴᡝᠵᡳᠨᡝ ᡳᡴᡨᠠᡴᠠᠪᡳ᠈ ᡝᡵᡝᠪᡝ ᠠᡳ᠌ᡴᠠ ᡤᠠᡵᡠ ᡨᡠᡵᡠ ᠰᠠᠮᠰᡳᠪᡠᡵᡝ ᠸᠠᠯᡳᠶᠠᠪᡠᡵᡝ ᠣᠴᡳ᠈ ᠴᠣᡴᠣ ᡳ ᡝᠪᠴᡳ ᠰᡝᡥᡝ ᠨᠠᠰᠠᠴᡠᡴᠠ ᡩᡝ ᡳᠰᡳᠨᠠᡵᠠᡥᡡ ᠰᡝᠮᡝ᠈ ᡨᡝᡵᡝᠴᡳ ᡴᡳᠮᠴᡳᠮᡝ ᠶᠠᡵᡤᡳᠶᠠᠯᠠᠮᡝ᠈ ᠵᡠᠸᠠᠨ ᡠᠪᡠ ᡳ ᡩᠣᡵᡤᡳ ᠵᡠᠸᡝ ᡳᠯᠠᠨ ᡠᠪᡠ ᠪᡝ ᠠᠴᠠᠮᠵᠠᠮᡝ ᡧᠣᡧᠣᡶᡳ᠈ ᡶᡳᠶᡝᠯᡝᠨ ᠮᡝᠶᡝᠨ ᡶᠠᡴᠰᠠᠯᠠᠮᡝ ᠠᡵᠠᡶᡳ᠈ ᡠᡥᡝᡵᡳ ᡳᠯᠠᠨ ᡨᠠᠩᡤᡡ ᡶᡠᠨᠴᡝᡵᡝ ᠮᡝᠶᡝᠨ᠈ ᡝᠮᡠ ᠶᠣᡥᡳ ᠣᠪᡠᠮᡝ ᠪᠠᠨᠵᡳᠪᡠᡥᠠᠪᡳ ᡤᡝᠯᡳ ᡤᡡᠨᡳᠴᡳ᠈ ᠨᡝ ᠪᡳᠰᡳᡵᡝ ᠮᠠᠨᠵᡠ ᡤᡳᠰᡠᠨ ᡳ ᠮᡝᠶᡝᠨ ᡳ ᡩᠣᡵᡤᡳ᠈ ᠰᠠᡳ᠌ᠨ ᠪᡝ ᡤᠠᡳ᠌ᡥᠠ ᠰᡝᠮᡝ ᠸᠠᠵᡳᡵᠠᡴᡡ ᠪᡳᡴᠠᡳ᠈ ᠮᡝᠨᡨᡠᡥᡠᠨ ᠠᠯᠪᠠᡨᡠ ᠪᡝ ᠪᠣᡩᠣᡵᠠᡴᡡ᠈ ᡤᡝᠯᡳ ᡝᡵᡝ ᠪᡳᡨ᠌ᡥᡝ ᠠᡵᠠᡥᠠᠩᡤᡝ᠈ ᡤᡝᠯᡥᡠᠨ ᠠᡴᡡ ᠸᡝᡳ᠌ᡥᡝᡩᡝ ᠪᡝ ᠨᡳᠴᡠᡥᡝᡳ ᡩᠣᠯᠣ ᠪᠠᡵᠠᠪᡠᡵᡝᠩᡤᡝ ᠸᠠᡴᠠ᠈ ᡳᠨᡝᡴᡠ ᡠᠨᠴᡝᡥᡝᠨ ᡳ ᠰᡳᡵᠠᠪᡠᡵᡝ ᠵᡳᠪᠴᠠ ᠠᡩᠠᡵᠠ ᠪᠠᠯᠠᠮᡝ᠈ ᡝᠮᡝᠮᡠ ᠮᠠᠵᡳᡤᡝ ᠨᡳᠶᡝᠴᡝᠴᡠᠨ ᠪᡳᠰᡳᡵᡝ ᠠᡳ ᠪᠣᠯᠵᠣᠨ ᠰᡝᡵᡝ ᡨᡠᡵᡤᡠᠨ᠈ ᡝᡵᡝᡳ ᡩᠣᡵᡤᡳ ᠰᡠᠯᠠ ᡤᡳᠰᡠᠨ ᠪᡠᠶᠠᠰᡳ ᡥᡝᡵᡤᡝᠨ᠈ ᠮᠠᠩᡤᠠᡳ ᠠᠩᡤᠠ ᡧᠠᠨ ᡩᡝ ᡧᡠᡶᠠᠮᡝ ᡤᠠᡳ᠌ᡥᠠ ᡠᠵᠠᠨ ᡧᠠᠯᠠ ᠪᡳᠴᡳᠪᡝ᠈ ᡥᠣᠨᠣ ᠰᡠᠰᡠ ᡤᠠᡧᠠᠨ ᡳ ᠰᡠᠯᠠᡥᠠ ᡠᡵᡤᡝᠨ ᡨᡠᡨᠠᠪᡠᡥᠠ ᠠᠮᡨᠠᠨ᠈ ᠰᡝᡵ ᠰᡝᠮᡝ ᠪᠠᡴᡨᠠᡴᠠ ᡤᡝᠰᡝ ᠣᡶᡳ᠈ ᡨᡠᡨ᠌ᡨᡠ ᠠᠨ ᡳ ᡤᡳᠰᡠᠨ ᡩᡝ ᠠᠮᡨᠠᠨ ᠪᡝ ᠰᠠᡵᠠ ᠪᡳᡨ᠌ᡥᡝ ᠰᡝᠮᡝ ᡤᡝᠪᡠᠯᡝᡥᡝ᠈ ᠵᠠᡳ ᠮᠠᠨᠵᡠᡵᠠᡵᠠ ᡴᠣᡠ᠋ᠯᡳ ᡩᡝ ᡨᠣᡴᡨᠣᡥᠣ ᡤᡳᠰᡠᠨ ᡳ ᠰᠣᠩᡴᠣᡳ ᡤᡳᠰᡠᡵᡝᡵᡝᠩᡤᡝ ᠪᡳ᠈ ᠮᡠᡩᠠᠨ ᠪᡝ ᡥᠠᠯᠠᠮᡝ ᡤᡳᠰᡠᡵᡝᡵᡝᠩᡤᡝ ᡳᠨᡠ ᠪᡳ᠈ ᡥᡝᡵᡤᡝᠨ ᠨᠣᠩᡤᡳᡶᡳ ᡤᡳᠰᡠᡵᡝᡵᡝᠩᡤᡝ ᠪᡳ᠈ ᡥᡝᡵᡤᡝᠨ ᡝᡴᡳᠶᡝᠮᠪᡠᡶᡳ ᡤᡳᠰᡠᡵᡝᡵᡝᠩᡤᡝ ᡳᠨᡠ ᠪᡳ᠈ ᡠᡵᡠᠨᠠᡴᡡ ᡠᡨ᠌ᡨᡠ ᠰᠣᠩᡴᠣᠯᠣᠮᡝ ᠮᠠᠨᠵᡠᡵᠠᠮᡝ ᡤᡝᠨᡝᠴᡳ᠈ ᡨᡝᠨᡳ ᡶᡝ ᡠᡵᡤᡝᠨ ᠪᡝ ᡠᡶᠠᡵᠠᡵᠠᡴᡡ᠈ ᠮᡠᡩᠠᠨ ᠣᠩᡨᠣᠨ ᠠᡴᡡ ᡨᠣᠮᠣᡵᡥᠣᠨ ᠣᠴᡳ ᠣᠮᠪᡳ᠈ ᡠᡨ᠌ᡨᡠ ᠣᡶᡳ ᡤᡳᠰᡠᠨ ᡩᡝ ᡴᡝᠮᡠᠨ ᠪᠠᡥᠠᡴᡳᠨᡳ᠈ ᠮᡠᡩᠠᠨ ᡩᡝ ᡤᡝᡨᡠᡴᡝᠨ ᠯᠠᠯᡳ ᠣᡴᡳᠨᡳ ᠰᡝᠮᡝ᠈ ᠮᠠᠨᠵᡠᡵᠠᡵᠠ ᡶᡝ ᡠᡵᡤᡝᠨ ᡳ ᠪᡳᡨ᠌ᡥᡝ ᡝᠮᡠ ᡩᡝᠪᡨᡝᠯᡳᠨ ᠪᡝ ᡴᠠᠮᠴᡳᠪᡠᠮᡝ ᡩᠣᠰᡳᠮᠪᡠᡥᠠᠪᡳ᠈ ᠪᠠᡥᠠᠴᡳ ᡩᡝᠨ ᡤᡝᠩᡤᡳᠶᡝᠨ ᠠᡤᡠᠰᠠ᠈ ᡶᡠᠰᡳᡥᡡᠨ ᡳ ᡩᠠᠪᠠᡧᠠᡴᡡ ᠠᠯᠪᠠᡨᡠ ᠪᡝ ᠪᠠᡴᡨᠠᠮᠪᡠᡶᡳ᠈ ᠠᠴᠠᠨᠠᡥᠠᡴᡡ ᠠᡴᡡᠮᠪᡠᡥᠠᡴᡡ ᡨᠠᡧᠠᡵᠠᡥᠠ ᠪᠠᠪᡝ ᡨᡠᠸᠠᠨᠴᡳᡥᡳᠶᠠᠮᡝ ᡩᠠᠰᠠᡵᠠᡠ᠋᠈ ᡧᠠᡥᡡᡵᡠᠨ ᡥᠠᠯᡥᡡᠨ ᠪᡝ ᡝᠮᡤᡝᡵᡳ ᡧᡠᡵᡩᡝᠮᡝ ᡥᡝᡨᡠᡶᡳ᠈ ᡳᠰᠠᠮᠵᠠᠮᡝ ᠠᡵᠠᠮᡝ ᡧᠠᠩᡤᠠᡥᠠ ᠪᡝ ᡩᠠᡥᠠᠮᡝ᠈ ᡠᡩᡠ ᠰᡠᠰᡝ ᡤᡳᠰᡠᠨ ᠠᡵᠠᡶᡳ᠈ ᡠᠵᡠ ᡩᡝ ᠰᡳᠨᡩᠠᡥᠠ᠉ ᠰᠠᡳ᠌ᠴᡠᠩᡤᠠ ᡶᡝᠩᡧᡝᠨ ᡳ ᠰᠠᡥᠠᠯᡳᠶᠠᠨ ᡳᠨᡩᠠᡥᡡᠨ ᠠᠨᡳᠶᠠ ᠨᡳᠶᡝᠩᠨᡳᠶᡝᡵᡳ ᡩᡠᠯᡳᠮᠪᠠᡳ ᠪᡳᠶᠠᡩᡝ ᡠᡴᠰᡠᠨ ᡤᡠᡳ ᡦᡠ ᡳᡥᡳᠩ ᡧᡠᡨᡠᠴᡳᠨ ᠠᡵᠠᡥᠠ᠉ ᠰᠠᡳ᠌ᠴᡠᠩᡤᠠ ᡶᡝᠩᡧᡝᠨ ᡳ ᠰᠣᡥᠣᠨ ᡤᡡᠯᠮᠠᡥᡡᠨ ᠠᠨᡳᠶᠠ ᠵᡠᠸᠠᡵᡳ ᡠᠵᡠᡳ ᠪᡳᠶᠠᡩᡝ ᠶᡡᠨ ᡦᡠ ᠵᠠᠴᡳᠩᡤᠠ ᡳ ᡶᠣᠯᠣᠮᡝ ᡨᠣᡴᡨᠣᠪᡠᡥᠠ᠉

庸言知旨序 國語者 吾輩方言 本天籟也 溯我先輩 幼甫能言 即習 國語 口非是無以言 耳非是無以聽 不復知有華言 故矢諸口也 自然精純 不須乎督課也 泊夫 定鼎入都 垂二百年 居是邦者 雜以夷夏方言 多習漢俗 幼而叩清語 懵如也 長而習焉唯清書之是賴 夫欲從事於方言問對 而授 以附會漢語之清書 不猶課楚 人以齊論 而欲其 齊語 得毋戛戛其難乎 然則非話條之占畢 口耳之專 攻 罔知其旨趣也審 矣 庚申予任巴里坤 政 務多暇 撿舊篋中童時之 所諮詢於耆老與夫承乏東省 采諸故鄉人之口頰者 片楮之積 若干 計此而任其凋零散佚 恐貽雞肋之惜 爰加考 酌 十撫其二三 分次縷條 幾三百餘則 編為 一帙 惟是當世話條 美不勝收 不揣固陋 複為此者 非敢標瓦礫于珠林 只以續尾成裘 不無小補 就中片言 臢語無非口耳所得之緒余 而於梓裡之故旨遺音 庶幾芥納之似焉 因以庸言知旨名之 至若清語成章 有遵原 句而言者 亦有變音而言者 有益字而言者 複有汰字而言者 必循是以往而後 旨不失其朔 音不涉其俚 而協矩矣 故詞也蘄 合於規 音也欲明且捷 以清語母音一卷附而綴之 幸高明諸子諒鄙人之僭陋 即其舛謬不周者厘正之焉 越寒暑 輯成告蕆 草 數言弁於首雲 嘉慶歲次壬戌仲春宗室桂圃宜興序 嘉慶歲次己卯初夏芸圃查清阿刊訂

1. 原书满汉合璧不分栏,一列满文，一列汉文，相间排列；此处为便于显示，分两栏，满、汉文各一栏