目睭是不只宝贝兮物，所以备办逐项齐备来保护。目仁深入目睭窝，双爿顶下拢有肌肉随便通转轮，按呢若爱看边头兮物抑是悬低兮物，只有著转轮一下则会看见。目仁顶下颔有目睭皮会褫开会合。若有甚物咧欲磕著就家己会𥍉来保护目睭。目睭皮兮墘有目睫毛是予坱埃佮属胡蝇兮类较袂入。目墘也会生淡薄油予顶下兮墘较袂相黏。
目睭有兮顶面外角有目屎泉差不多亲像杏仁兮大。伊兮功用是会生液若水来常常润泽目睭阁有一条细细兮管，目屎对遮兮管流落鼻空内则匀匀仔焦去。设使侬艰苦心啼哭目屎则生较济，流袂一尽落鼻就满出伫面。减采目睭用著就连鞭有目油较济会流出来洗除。
