翻译:恶之华/唐璜在冥府

唐璜在冥府
作者：夏尔·皮耶·波德莱尔
译者：木枚

本作品收录于《Translation:恶之华》

唐璜喺冥河涉水而下，
将摆渡钱畀卡隆嗰阵，
个暗沉嘅乞儿，目光如安提西尼自夸
捉实晒两边船桨，双手怀恨。

有女人双乳揈揈，衣不蔽体，
喺漆黑嘅天空下蠕动，
况如一大班供品要活祭，
似牛叫嘅呻吟流连喺身后嘅半空。

斯加拿尔笑住要人畀佢薪资，
同时亡灵喺岸边游走，
畀当路易用颤抖嘅手指示意，
有个𡃁仔笑佢老豆白雪雪嘅额头。

贞洁消瘦嘅艾菲华抽泣又哀痛，
其不忠嘅旧情人，同佢一齐。
佢想喺情人面上挤出铭心嘅笑容，
好令佢谂起当初甜蜜嘅山盟海誓。

个硬汉一身装甲，气度不凡，
操住船舵，喺黑水划破波澜，
但拄住长剑嘅枭雄气定神闲，
怔怔对住乱流，但不屑一盼。