救國方針

維基文庫,自由的圖書館
跳至導覽 跳至搜尋
救國方針
作者:孫中山
1924年5月30日

上海《中國晚報》請孫大元帥演講。

   諸君,我哋大家係中國人。我哋知道中國幾千年來係世界上頂富頂強之國家,知道唔知道呢?但係現在中國係乜嘢嘅情形呢?中國現在就變成係世界上頂貧頂弱嘅國。中國嘅人民出海外嘅,就俾外國人欺負凌辱,看不上一個人樣;喺中國內地呢,外國對於我哋嘅政府呢,對於我哋嘅國家呢亦係睇唔起。所以,外國就有意對中國來瓜分呢一說。後來呢,覺得呢個瓜分呢,係好難實行,恐怕因為瓜分中國呢,惹出就各國自己打自己。所以呢,現在各國就協同來商量,要把中國嘅國事嚟共管,大家嚟共管中國,就係呢睇中國唔起,以為中國係不能自己管治中國。
   諸君,試想想:我哋中國幾千年來係世界一個文明嘅國家。幾千年前中國最強盛嘅時代,就所謂千邦進貢萬國來朝,各國都要拜中國嘅上風。到到今日呢,中國反為係退化,呢個係為乜緣故呢?就係中國從舊滿州征服以後,中國人就失了個國家精神。中國亡國於滿州二百六十幾年呢,中國嘅人民就喺呢二百六十幾年之內呢就瞓著覺。所以,中國就政治退化、就文明退化、中國工商業退化,中國總所以到到今日就成為民窮財盡,就變成各國睇唔起。
   中國墮落到今日呢個地位,我哋做國民嘅要有一種乜嘢嘅感覺呢?我哋對於國家,第一事我哋知道我哋今日之危險,先知道危險呢,我哋要設法子嚟避呢個危險,咁用乜嘢法子嚟避得呢個危險呢?就要大家同心協力嚟贊成革命,用革命嘅方法、用革命嘅主義嚟救中國。革命嘅主義係乜嘢呢?就係我哋嘅三民主義。第一,就係民族主義;第二,民權主義;第三,民生主義,用呢三種嘅主義呢,嚟救中國。呢三種嘅主義呢,我哋嘅大家要留心、要嚟考究。
   噉從邊處能考究得呢個三民主義呢?對於呢個三民主義,我近日在呢個廣東高師,每禮拜演說一次㗎。頭一個民族主義呢,就演說了六個禮拜就講完喇;第二個民權主義呢,又演說了六個禮拜講完喇;第三個民生主義呢,不日再嚟演講。現在呢個民權主義、民族主義兩種呢已經係刻書出嚟。咁所以諸君呢,留心呢個三民主義呢要將我呢個三民主義、呢啲演說,要嚟留心詳細嚟讀過。
   呢個三民主義呢係講得好透澈嘅,係發揮得好精密嘅,裡頭呢有好多新思想、好多新發明。諸君能讀呢個三民主義呢,就曉得用乜嘢方法嚟救國啦。我哋能照住三民主義呢種嘅方法、呢種嘅精神,大家同心協力嚟救國呢,咁就中國就可以反弱為強喇、轉貧為富喇,就可以同今日之列強嚟並駕齊驅喇!


PD-icon.svg 1996年1月1日,這部作品在原著作國家或地區屬於公有領域,之前在美國從未出版,其作者1925年逝世,在美國以及版權期限是作者終身加80年以下的國家以及地區,屬於公有領域

這部作品也可能在本國本地版權期限更長,但對外國外地作品應用較短期限規則的國家以及地區,屬於公有領域