翻譯:惡之華/亞伯同該隱
| ← | 聖彼得不認主 | 亞伯同該隱 作者：夏爾·皮耶·波德萊爾 譯者：木枚 |
撒旦嘅連禱文 |
|
壹
I
亞伯一族，安睡飲食，
神向你報以和藹笑面。
該隱一族，陷於糞溺，
匍匐，然後死得可憐。
亞伯一族，你嘅獻奉
叫熾天使面露喜悅!
該隱一族，你嘅苦痛
要幾時先可以斷絕?
亞伯一族，你望一望
你嘅種子同家畜接踵而嚟，
該隱一族，你嘅內臟
似老狗噉因為肚餓而叫吠。
亞伯一族，用祖傳壁爐口
將肚腹溫燙，
該隱一族，喺自己嘅竇
打冷震，可憐嘅豺狼!
亞伯一族，相親相愛再多結果子!
你嘅黃金一樣兒孫滿堂。
該隱一族，其心燃燒熱熾，
要小心諸種巨大嘅欲望。
亞伯一族，你擴張再蠶蝕
恍似害蟲身處樹木!
該隱一族，家人親戚，
綿延喺路上進退維谷。
貳
II
啊!亞伯一族，你嘅屍身
令生煙嘅土地更肥沃!
該隱一族，你嘅辛勤
係有付出但並不足。
亞伯一族，你嘅恥辱由以下可見:
就係劍竟然輸畀矛!
該隱一族，登上蒼天
捉住上帝向地上拋。
