翻譯:惡之華/我從深處向你求告

我從深處向你求告
作者：夏爾·皮耶·波德萊爾
譯者：木枚

本作品收錄於《Translation:惡之華》

喺我心靈所墮入嘅漆黑深淵，
我唯一嘅愛啊，我求你憐憫，
呢個憂鬱嘅宇宙畀地平線封印，
恐懼同褻瀆喺夜晚兜轉。

有六個月太陽冰冷，喺天上往復，
另外六個月黑夜將地上罩起，
呢個國度仲荒蕪過極地，
無獸無河，無草無木。

但世上最恐怖嘅嘢莫過於此，
就係冰結嘅太陽殘酷嘅寒意，
同似遠古混沌嘅夜晚，永無止境。

我好妒忌最低賤嘅禽獸嘅宿命，
佢哋喺空洞嘅睡眠中沉溺，
然後歲月如織，悠悠開釋。