港督金文泰創立香港大學華文系之公開演講

港督金文泰創立香港大學華文系之公開演講
大英帝國港督金文泰
1927年

香港大罷工後的1927，時任港督金文泰倡議香港大學成立中文學院，結果校方邀得清朝翰林賴際熙、區大典等到中文學院教授經典，並獲富商鄧志昂和馮平山捐款建院及中文圖書館等。

金文泰當時以廣東話公開演講，列舉三個香港大學設立華文系的理由。

列位先生，提高中文學業，周爵紳，賴太史，今日已經發揮盡致，毋庸我詳細再講咯，我對於呢件事，覺得有三種不能不辦嘅原因，而家想同列位談談。

（第一）係中國人要顧全自己祖國學問呀，香港地方，華人居民，最佔多數，香港大學學生，華人子弟，亦係至多，如果在呢間大學，徒然側重外國科學文字，對於中國歷代相傳嘅大道宏經，反轉當作等閑，視為無足輕重嘅學業，豈唔系一件大憾事嗎，所以為香港中國居民打算，為大學中國學生打算，呢一科實在不能不辦。

（第二）係中國人應該整理國故呀，中國事物文章，原本有極可寶貴嘅價值，不過因為文字過於艱深，所以除曉書香家子弟，同埋天分極高嘅人以外，能夠領略其中奧義嘅，實在很少，為呢個原故，近年中國學者，對於「整理國故」嘅聲調已經越唱越高，香港地方，同中國大陸相離，僅僅隔一衣帶水，如果今日所提倡嘅中國學科，能夠設立完全，將來集合一班大學問嘅人，將向來所有困難，一一加以整理，為後生學者，開條輕便嘅路途，豈唔系極安慰嘅事咩，所以為中國發揚國光計，呢一科更不能不辦。

（第三）就係令中國道德學問，普及世界呀，中國通商以來，華人學習語言文字，成通材嘅，雖然項背相望，但係外國人精通漢學，同埋中國人精通外國科學，能夠用中國言語文字翻譯介紹各國高深學術嘅，仍然係好少，呢的豈系因外國人，同中國外洋留學生，唔願學華國文章，不過因中國文字語言，未曾用科學方法整理完備，令到呢兩班人，抱一類「可望而不可即」之嘆，如果港大「華文學系」得到成立健全，就從前所有困難，都可以由呢處逐漸解免，個時中外求學之士，一定多列門墻，爭自濯磨，中外感情，自然更加濃浹，唔會有乜野隔膜咯，所以為中國學問及世界打算，呢一科亦不能不辦。

列位先生，我記得十幾年前有一班中國外洋留學生，因為想研精中國學問，也曾出過一份「漢風雜誌」，個份雜誌，書面題辭，有四句集文選句，十分動人嘅，我願借嚟貢獻過列位，而且望列位實行個四句題辭嘅意思，對於「香港大學文科，華文系」贊襄盡力，務底於成，個四句題辭話，「懷舊之蓄念，發思古之幽情，光祖宗之玄靈，大漢之發天聲」。