身體理/論腦部
< 身體理
第96節[编辑]
腦部通分做頭腦、脊腦佮腦線。頭腦是百體兮中間第一活靈兮部位，見若覺悟，以及逐號管運動兮心意佮思想、七情，攏對頭腦發出。頭腦是佇頭顱骨內，有3重膜咧包伊密密，較袂受磕著。外重名叫腦筋衣，中重叫做腦溼衣，內重叫做腦血衣因為有微血管四圍分散咧養飼腦。頭腦兮形勢略仔親像雞卵兮款式，前面較尖形，後面較闊。
第97節[编辑]
頭腦分4位，就是大腦、小腦、腦橋佮延腦。大腦是做頭腦兮頂頭佮前面彼段，小腦囥佇後面閣下底。大腦佮小腦兩項會分左右2爿，閣逐个有腦質，予左右2爿會相連。
延腦是一條腦質，會予大腦佮脊腦相連。大腦有濟濟迴痕，窟窟曲曲親像核桃仁兮款式。痕中兮空隙深淺無相同，第一深兮差不多一寸。各儂大腦兮痕也無同。嬰仔兮痕較搝也無甚物明，到中年就較深佮明。
小腦是佇大腦兮後面佮下底，是略仔親像細兮拳頭母。伊兮痕毋是彎曲親像大腦兮，是直直兮。腦兮質外面是火麩色，內面較濟是白色兮質，若是猶原有血麩色兮結佇咧。血麩色兮質會生起意志佮思想，白兮質是袂算得兮幼幼兮線，會傳彼个意志到別位。