翻译:惡之華/寓言

寓言
作者：夏爾·皮耶·波德萊爾
譯者：木枚

本作品收錄於《Translation:惡之華》

如此美人延頸豐項，
任秀髮喺酒杯流淌。
情愛嘅爪牙，同埋妓寨嘅毒藥，
一切喺佢皮上雲石跣走再減卻。
佢恥笑死亡，並嘲弄浪蕩自由，
呢啲怪獸一直摩擦、收割嘅手
喺佢哋蹂躪嘅遊戲度特別尊重，
呢副硬直嘅身體上粗暴嘅尊崇。
佢似個女神行進，似個蘇丹靜處，
其穆斯林嘅信念，見於佢嘅歡愉，
同畀佢胸脯充滿嘅懷抱，
眾生都受佢嘅眼神呼告。
呢個無後嘅處女對天道時務
至關重要，佢相信，佢知道
肉體嘅美係至高嘅饋贈，
去抽取赦免自一切罪行。
佢唔將地獄同煉獄放喺眼內，
仲有當進入黑夜嘅時分到來，
佢眼神會同死亡嘅面容相會，
就好似個新生兒噉無恨無悔。