翻译:恶之华/朝早暮色

朝早暮色
作者：夏尔·皮耶·波德莱尔
译者：木枚

本作品收录于《Translation:恶之华》

黛安娜喺兵营庭院唱歌，
朝早嘅和风向灯笼拂过。
而家系不祥嘅幻梦纷至嘅时刻，
去令枕上嘅黑肉少年辗转反侧，
灯光喺度投射一点红斑，
似只狂暴嘅眼抖震跳弹，
灵魂将酸馊肉体嘅沉重承受。
模仿灯光同阳光之间嘅搏斗。

就似面容上嘅泪水畀微风拂拭，
颤抖充满空气嘅事物四处逃匿，
男人疲于写作，女人倦于恋爱，
众屋宇嘅东西南北，生烟暧暧。
水性杨花嘅女人，眼皮铁青，
口擘擘，喺愚蠢睡意仲未醒，
啲女乞儿拖住肌寒交逼嘅胸脯，
然后对上面嘅灰烬同手指呼吐。

拮据嘅女人一边发冷一边生仔，
系时候令佢哋嘅痛苦变本加厉。
血沫涌起，啜泣不再，
雄鸡一叫，撕破雾霭，
雾洋烟海将宏厦迷住，
将死之人喺病院深处
以参差嘅间歇呼出最后一声喘息
放荡男女归家，因自己所为竭力。

晨曦著住红绿相间嘅华服荡漾
朝住无人烟嘅塞纳河慢慢迈向，
忧郁嘅巴黎捽一捽眼眶，
呢个老工人再擸起架罉。