翻译:惡之華/朝早暮色

朝早暮色
作者：夏爾·皮耶·波德萊爾
譯者：木枚

本作品收錄於《Translation:惡之華》

黛安娜喺兵營庭院唱歌，
朝早嘅和風向燈籠拂過。
而家係不祥嘅幻夢紛至嘅時刻，
去令枕上嘅黑肉少年輾轉反側，
燈光喺度投射一點紅斑，
似隻狂暴嘅眼抖震跳彈，
靈魂將酸餿肉體嘅沉重承受。
模仿燈光同陽光之間嘅搏鬥。

就似面容上嘅淚水畀微風拂拭，
顫抖充滿空氣嘅事物四處逃匿，
男人疲於寫作，女人倦於戀愛，
眾屋宇嘅東西南北，生煙曖曖。
水性楊花嘅女人，眼皮鐵青，
口擘擘，喺愚蠢睡意仲未醒，
啲女乞兒拖住肌寒交逼嘅胸脯，
然後對上面嘅灰燼同手指呼吐。

拮据嘅女人一邊發冷一邊生仔，
係時候令佢哋嘅痛苦變本加厲。
血沫湧起，啜泣不再，
雄雞一叫，撕破霧靄，
霧洋煙海將宏廈迷住，
將死之人喺病院深處
以參差嘅間歇呼出最後一聲喘息
放蕩男女歸家，因自己所為竭力。

晨曦著住紅綠相間嘅華服蕩漾
朝住無人煙嘅塞納河慢慢邁向，
憂鬱嘅巴黎捽一捽眼眶，
呢個老工人再擸起架罉。