翻譯:惡之華/嗰個畀你妒忌嘅善心女僕
| ← | 朝早暮色 | 嗰個畀你妒忌嘅善心女僕 作者：夏爾·皮耶·波德萊爾 譯者：木枚 |
喺城邊，我仲記得 |
|
嗰個畀你妒忌嘅善心女僕，
入睡於一片唔顯眼嘅草綠。
我哋都應該送返幾朵花畀佢。
可憐嘅死人承受嘅痛苦至巨，
十月嘅秋風恍似剪刀，
愁風吹向佢哋嘅石墓，
當然佢哋見到啲活人不知感恩，
如常噉喺溫暖嘅被鋪入邊瞓緊。
但係冰凍嘅老骨畀幻想鯨吞，
獨自入眠，對話都乏善可陳，
畀蛆蟲喺佢身上動工，
感覺冬雪冇水喺當中。
無親無故，感覺埋歲月流逝，
將懸掛喺鐵欄前嘅爛布換替，
木材嘶嘶叫鳴嘅嗰晚好平靜，
我睇到佢喺張扶手櫈度坐定，
十二月有晚蒼藍又寒冷之際，
我發現佢喺我房嘅一角踎低，
神情凝重，從永恆嘅床深處嚟到，
包住經佢慈母嘅雙眼養大嘅細路，
望住淚水從佢凹陷嘅眼瞼掉落，
我仲點向呢個虔誠嘅靈魂反駁?
