翻譯:惡之華/蘭舟

蘭舟
作者：夏爾·皮耶·波德萊爾
譯者：木枚

本作品收錄於《Translation:惡之華》

甜美嘅尤物，我想同你訴說，
風情萬種將你嘅青春點綴，
我想向你嘅美深入，
繪出佢幼嫩同成熟嘅珠聯壁合。

當你著住翩翩長裙行走，
睇落好似要出航嘅蘭舟，
順住溫柔、慵懶、緩慢嘅節奏，
風帆全開，隨波浪滾流。

你嘅肩頸圓潤寬大，
五官以異邦嘅光輝顯擺，
泰然自若，氣揚趾高，
尊貴嘅細路，你踏上自己嘅征途。

甜美嘅尤物，我想同你訴說，
風情萬種將你嘅青春點綴，
我想向你嘅美深入，
繪出佢幼嫩同成熟嘅珠聯壁合。

你嘅胸脯浮凸，閃爍不住，
洋洋得意，係個珍美嘅衣櫥，
門板凹陷又分明，
似個細圓盾光澤炯炯。

挑逗人嘅圓盾，配備粉紅嘅尖啄，
美好秘密嘅衣櫥，滿載美好景象，
紅酒、香芬、利口酒，
令人理性同感性都歡喜個夠。

當你著住翩翩長裙行走，
睇落好似要出航嘅蘭舟，
順住溫柔、慵懶、緩慢嘅節奏，
風帆全開，隨波浪滾流。

你對高貴嘅腳喺佢追逐嘅裙擺下，
將陰暗嘅慾望撩動同千刀萬剮，
好似兩個巫師一同
將長樽嘅黑色藥水攪動。

你雙手同發光嘅毒蛇平分秋色，
連早熟嘅大力士要做對手都唔值，
天生就係用嚟畀人握緊，
彷似要喺你嘅心同愛人身上烙印。

你嘅肩頸圓潤寬大，
五官以異邦嘅光輝顯擺，
泰然自若，氣揚趾高，
尊貴嘅細路，你踏上自己嘅征途。