翻译:惡之華/貓

貓
作者：夏爾·皮耶·波德萊爾
譯者：木枚

本作品收錄於《Translation:惡之華》

Le Chat

嚟啦優美嘅貓，嚟我含情嘅心口度，
將你腳上嘅爪收好，
畀我向你嘅美目傾倒，
佢哋蘊含金屬同瑪腦。

當我嘅手指徐徐
撫摸你嘅頭同柔軟嘅脊椎，
我隻手喺快樂陶醉
去感受你帶電嘅身軀。

我睇見我女人容光煥發，佢嘅眼神
好似你呢隻得人鍾意嘅野獸，
深沉又冰冷，似刺一樣尖銳拮人，

同埋由腳到頭，
微妙嘅氣質，同危險嘅芬芳，
喺佢黝黑嘅身體周圍飄蕩。

Le Chat

壹
I
佢喺我腦人邊散步，
好似喺佢屋企噉樣，
呢隻貓優美強悍，溫柔瀟湘。
佢嘅叫聲啲人唔係好聽得到，

佢嘅聲線柔美又樸實，
但當佢復靜或低吟
把聲就會豐富又深沉，
呢個就係佢嘅魅力同秘密。

呢把聲似珍珠落玉盤，
滴穿我最黑暗嘅深處，
似豐饒嘅詩歌將我填注，
似巫藥令我騰歡。

佢令最殘忍嘅痛苦沉睡，
包藏所有嘅狂悅，
就算佢嘅表達滔滔不絕，
都唔需要任何文章字句。

唔係，佢唔係喺我嘅心上
呢個完美樂器上遊曳嘅弓弦，
然後令最波動嘅琴線
高貴噉歌唱，

更勝於你。貓，你玄妙、
純潔又怪異，
一切喺你裡面就似天使，
難以捉摸又諧和協調。

貳
II
從佢啡金相摻嘅毛，
散發極柔美嘅香氣，
有晚我畀佢澤披，
我摸咗一次咁多，再多都冇。

呢個係個熟悉嘅靈魂，
佢君臨、振奮、賞罰
其帝國轄下嘅萬事萬物，
佢係咪仙女嚟?定係神?

當我嘅目光好似畀磁鐵吸引，
溫馴噉返回到
我嘅愛貓度，
然後我睇睇自身，

我震驚噉望見
凝視住我嘅有火光白瞳、
清輝嘅燈籠、
同七彩寶石嘅活靈活現。

Les Chats

狂熱者多情，智者刻苦，
佢哋喺結果季節平等愛慕
剛柔並重嘅貓呢啲鎮屋之寶，
佢同佢哋一樣，怕凍又足不出戶。

知識同快活嘅好友
尋覓緊深淵嘅平靜同恐怖，
如果佢哋可以放下身段，任怨任勞，
就會畀厄瑞玻斯當係死亡嘅斥候。

佢哋神遊，擺出偉大獅身人嘅尊容，
深深躺臥喺孤獨之中，
似係喺無盡嘅幻夢沉睡，
佢哋肥沃嘅下身滿載奇蹟嘅火種
同黃金嘅碎塊，仿如細沙散聚，
星羅棋布喺佢玄妙嘅瞳孔。