翻译:惡之華/告解
| ← | 逆轉 | 吿解 作者：夏爾·皮耶·波德萊爾 譯者：木枚 |
靈性嘅曙光 |
|
有次有個獨行、親切又甜美嘅女人
將手靠喺我隻手
(喺我漆黑深層嘅靈魂
呢個回憶永垂不朽)，
天色已晚，滿月朗朗，
似塊獎牌啱啱新製，
夜晚嘅莊嚴，似條大江，
滾滾穿過入夢嘅巴黎。
喺屋旁邊，馬車門底，
啲貓偷偷行經，
豎起耳仔，慢慢跟嚟，
似被寵愛嘅影。
嗰陣我哋促膝把臂，
突然有嘢孵化自潔白嘅光幕
自你，呢個豐富又響亮嘅樂器，
會奏鳴嘅只有發光嘅歡樂，
自你，本身明朗又歡快，
似耀眼朝早嘅號角，
有個音符哀怨又奇怪，
自你漏出，蹣跚跌宕，
似個瘦弱、恐怖、陰沉、污穢嘅細路
令家族面上愧色滿佈，
一直佢哋都唔將其存在向人昭告，
偷偷收佢喺地窖度。
陰公嘅天使歌唱，以花哨音色:
「呢度冇一樣嘢係確定，
無論佢點將其藏匿，
人類嘅自大都不證自明。
做個靚女都唔輕省，
呢個都係舞者死板嘅工作，
佢瘋狂而冰冷，
喺機械式噉微笑嗰陣失去知覺。
喺心靈上建立任何嘢都係傻，
愛同美，所有嘢都會爛，
直到遺忘將佢哋掉入個籮，
再向永恆歸還。」
我經常喺心靈嘅告解室
喚起呢個附咗魔嘅月亮、
呢種沉默、懶逸、
低聲訴盡駭人嘅衷腸。
