翻译:惡之華/聖彼得不認主
| ← | 情愛與頭顱 | 聖彼得不認主 作者：夏爾·皮耶·波德萊爾 譯者：木枚 |
亞伯同該隱 |
|
詛咒浪潮晝夜奔向親愛嘅熾天使，
神對此又有何計可施?
就似個暴君肉林酒池，
喺我哋恐怖嘅瀆神柔聲委身睡意。
烈士同受虐者嘅號哭
無疑係令人心醉嘅交響曲，
而佢哋嘅愉悅所花費嘅血都不足
令上天嘅欲望有絲毫平復!
—啊!耶穌，快啲回憶返橄欖鄉!
邪惡嘅劊子手硾擊你嘅活體，
你出於純樸跪地祈求嘅嗰位
正喺天上嘲笑鐵釘嘅聲響，
當你見到販夫走卒嘅無賴，
對住你嘅神靈吐口水，
又當你感覺到荊棘深墜
頭殼，入面蘊含蒼生之博大。
當你嘅身體畀驚人嘅擔子壓垮，
再展開一對鼓脹嘅手臂，當你血液
同汗水喺越發蒼白嘅額頭游弋，
當你喺眾人面前擺好姿勢，似個靶，
你有冇幻想過咁耀眼美妙嘅日子，
就係你為咗實現永恆承諾而嚟到，
騎上一隻溫馴嘅驢，
踐踏道上一切花叢同樹枝，
你內心因希望同勇氣而脹卜卜
而狠毒鞭打呢堆仆街商人之後，
你最終會變成主宰?噉悔疚
又有冇比刺槍更能穿透你嘅脅腹?
—當然，至於我，我會走嘅，滿足於
行動同幻想並無結成金蘭嘅時世，
願剃人頭者如我嘅頭亦為人所剃!
聖彼得冇認耶穌......佢做得恰到好處!
