翻译:惡之華/遺忘河

惡之華/遺忘河
作者：夏爾·皮耶·波德萊爾
譯者：木枚

本作品收錄於《Translation:惡之華》

借我心胸歇息，無情鈍感嘅靈魂，
你係隻老虎，被寵愛又體態遲遲
我一直都好想將手指
深陷你嘅鬣毛嘅厚渾。

你嘅襯裙香氣苾苾，
將我疼痛嘅頭埋藏，
又似朵花已經凋亡，
散發住我失能嘅愛惡臭嘅甜蜜。

我想瞓著，寧願瞓著都好過生存!
喺呢種同死亡一樣舒服嘅沉睡，
我會喺你滑到好似黃銅嘅身驅，
佈滿親吻，無悔無怨。

要扼殺埋我平息咗嘅啜泣，
冇嘢比得上你張床嘅深淵，
強大嘅遺忘喺你嘴上留存，
遺忘河借你親吻流出流入。

我嘅宿命，從此就係我嘅愉悅，
我會順從被安排嘅命運。
溫馴嘅烈士，無辜嘅罪人，
佢哋嘅狂熱令其磨難不絕。

為咗淹沒我嘅積怨，
我會當係尖乳迷人嘅一端
對豬籠草同上好鐵杉吸吮，
佢哋從來都唔將心靈囚於方寸。