農場相褒歌
| 農場相褒歌 作者：麥國安 1934年 |
上本[编辑]
玉珍漢書部發行 編歌寄留嘉義市 新富町目我住居 六之拾九煞廣起 國安共恁說透枝 小弟原籍帶新竹 市制施設未改町 南門外街我地省 厝帶瓦治觀音亭 發行嘉義西市內 玉珍販賣印出來 望恁諸位罩紹介 代先廣告報恁知 臺灣農產第一等 甘蔗年冬好收成 文明發達農工省 着諒糖業行做前 臺灣第一是農產 產業方面頭一層 年收砂糖港千萬 農家樂業真平安 建設製糖大會社 運搬蔗種五分車 農場獎勵改良蔗 政府禁止人偷食 製糖會社設農場 苗圃甘蔗種歸鄉 甘蔗獎勵設有賞 農會主任肴主張 每部農場有監督 男女做工真娛樂 工業時間照約束 工價開了介相當 甘蔗種了愛培股 落肥蔗葉確能黑 無工來做卜省步 來去外庄倩新勞 卜倩月仔甲工人 落肥明年好收冬 種作的人愛秧望 秧望一屈生四欉 僥倖小漢無父母 無兄無弟命恰須 孤子本身做戶主 卜食三當加已匏 父母生咱不長用 家貧散赤孤不章 無本第一奧理想 失業个人足苦傷 乎倩記賬不識字 做工又閣欠家施 不趁家內無柴米 身軀幷無半分錢 听着人塊呌工人 廣卜農場去做工 想卜去做驚人共 卜做工課歸半冬 朋友相招去提定 娶咱去坐甘蔗車 想着一擺塊磅壁 孤不二終亦着行 坐車一困到苗圃 時間𫔘好日半埔 蔗園乾埔甲查某 女工派頭格真蘇 工頭娶入工寮內 明日做工隻出來 初到甲人無熟賽 暗塊怨嘆無人知 不覺日落來暗飯 倒落歸冥想甲光 煩惱脚酸甲手軟 工頭來呌卜出門 手提脚巾穿タビ クワ一人夯丨枝 農場物件真四是 不免工人起相爭 七点娶來落蔗園 時到男女着擔當 歸群工人化化損 干乾我塊心頭酸 甘蔗二个培一股 日頭曝甲面卜黑 不知做工隻艱苦 汗流滿面手黑塗 看君生成真皿送 一欵不是做工人 巧神親君生明籠 按盞伊亦來做工 擧頭看見巧粧嫂 生成秀氣足偶刀 衫褲格穿即哖好 蓋倒工場別个無 親君力阮金金看 娘仔注神在心肝 性情不知生按盞 不知古意亦鱸鰻 想卜行瓦偷問嫂 驚乎人笑我痴哥 無問心肝足不好 抄煩扒腹卜如何 君仔想甲人失神 我娘心肝有認真 能得近瓦見哥面 相會談言隻有親 心肝想娘一層代 念歌娘听着能知 双人那是有意愛 得確號頭念過來 听君汝念娘知影 我娘此平緊出聲 能得相會咱能命 再塊通近娘親兄 君仔行瓦偷問嫂 娘仔恁厝帶治刀 汝着照實共君報 免乎君仔去尋無 娘仔听君汝塊問 我娘帶治隔壁庄 等待日暗那回返 請君來去娘家門 呌我恁厝去𣅄� 驚娘厝內有親哥 代志人知着不好 時到汝我着花糕 听君汝說娘緊講 我娘都亦未嫁尫 無人知影娘輕重 恨我却四不成人 無尫幷敢有相好 不敢共娘返家和 人那知影咱作錯 能乎閑人打𣅄� 君仔敢去娘敢保 有事我娘保甲無 勸哥安心免煩惱 免驚我娘來害哥 驚娘負擔未得起 時到反悔着恰遲 無膽个人恰驚死 不敢力蝦喬鯉魚 我娘得確無呆子 不信親君去探听 時到確實能知影 不敢共君箭甲營 娘汝厝內外多人 乎娘農場來做工 敢無乾埔罩相共 乎汝趁錢去商邦 阮厝一个親老母 老爸早死瓦姊夫 大姊共阮帶同厝 大家做追公家匏 實在有影成經濟 骨力趁錢罩岸家 對人交接足好禮 工場取汝頭一个 君仔汝帶省地所 亦着共娘報對都 汝食幾歲隻娶某 家內得恰真肴湖 听着汝問喘大愧 乎我大嘴煞開開 生成老猿不成鬼 亦未娶某來做追 知君汝上肴假鬼 偏人無某通相隨 君仔生成隻哖水 我娘無尫上克虧 知汝生水人定見 此嗎青春當少年 尋無一欵隻新鮮 對我不免肴假仙 乎汝呵老卜宰樣 惡柴不敢假沉香 想卜嫁人做牽手 驚無好人共阮收 汝來無尫阮無某 月老摧遷隻對都 娘汝那無想偏路 汝我罔來相蛤湖 恨阮生醜隻却四 草地查某汝卜纏 才得汝看能合意 爸母生就難塊移 欣善汝水真活動 汝煞提詞草地人 親成代志那愿放 汝我通來結成双 不是我娘無合意 只驚君仔汝不纏 那卜共阮趁柴米 我娘家內罔罩鉗 娘仔那卜理家內 我卜趁錢提返來 汝我農場相意愛 有頭有尾隻合皆 汝我情意隻哖好 免驚我娘先僥哥 娘身那是有做錯 遂在哥仔汝伐落 汝咱愛情隻哖好 免驚君仔代先僥 听娘汝廣吾能曉 君身不敢說校梢 意賜那廣那相瓦 双人對看心肝活 娘來卜嫁君卜娶 不免我娘守孤單 作甲十点宿一困 十分鐘久宿食煙 一日二擺照時拵 監督行來前後巡 十分鐘久遂時到 娶娘坐治樹仔頭 克虧作工透中罩 乎日曝甲汗那流 看君歸身專是汗 我娘不甘在心肝 恨咱散赤卜按盞 即着受熱甲受寒 是我个命無塊廣 來作農場受風霜 無家無伙足寃枉 可惜甲娘初相逢 十分鐘久今都到 大家閣培甘蔗郊 十一点半宿中罩 娶娘食飯入內頭 君仔娶我來工寮 食飯腹肚隻未飫 初來相逢驚見少 貪君形体生清漂 点半時間落蔗園 一條蔗股隔中央 嘴來那廣那做損 未須冬瓜泡氷糖 下埔廣卜來落肥 燐酸扛扛做一追 西洋肥料免潑水 蔗股中央愛創開 運搬肥料來蔗園 麻袋內面底燐酸 我娘近瓦共哥問 元頭中國亦紅毛 一欵西洋个肥料 對娘汝廣無校梢 臺灣五路知了了 現部此款當大消 外國簡隻着猴損 製造一欵那白糖 落肥親像那食飯 那無蔗尾能臭黃 燐酸下在亞鉛桶 落肥蔗股愛開空 提在手內手那弄 輕要工課查某人 落肥二个作一股 頭前野空是乾埔 做甲一步又一步 肥落了後煞庵塗 硫安世了遂時嵌 却水來淹即能淡 農場工課照嵌漸 無水甘蔗未長蚶 一步硫安落二把 敎咱不通落相加 𫔘好也落甘蔗下 君仔鋤頭罔那把 一股落了又一股 做甲五点日暗黑 監督份單呌開路 查某份了份乾埔 我娘工單十八號 參拾五錢上偶刀 請君回返好不好 甲娘相娶返家和 娘仔卜返直直呌 君仔心肝真碍偶 卜去驚恁大姊笑 代志不知對倒着 君仔汝簡隻哖戇 那無見面未相當 阮个大姊未罔黨 一生賢會介巧粧 汝廣大姊真賢會 隻敢共娘返家回 伴手的物阮煞買 不免乎人加笑衰 巧神我君免人敎 甲娘心肝生相合 卜買伴手着恰早 日頭未暗好行踏 來去餅店買カシ 一盒壹圓五拾錢 洋餅粧包介四是 盒仔有花表布墘 看君手提西洋餅 我娘共君相娶行 能得做追天注定 歡喜配着答心兄 我娘頭前兄在後 相娶到娘厝脚兜 門口一隻黑狼狗 力兄吠甲無越頭 死犬亦未着犬症 無看主人行做前 娶君行入大廳頂 娘仔漸且入房宮 汝入房宮呌大姊 煞廣乎伊塊知机 因為咱卜做親儀 妹婿通好見大姨 呌阮大姉看妹婿 入去通知遂時來 我恰失禮且等待 煞廣乎阮老母知 入來大姉力咱看 小妹歡喜省因單 農場做工是按盞 有省代志在心肝 人阮亦無省乜代 姉妹參詳合應皆 想卜自己撰尫婿 嘴年不敢說出來 問汝干乾無愛廣 乎我心肝強發煌 有省代志愛卜創 姉妹參詳介相當 小妹未廣代先笑 干乾歡喜對倒着 人咱年歲食未小 打算卜嫁亦卜招 示大生咱二个人 父死我晟四五冬 嫁出親成我不放 等我共汝撰親尫 下集即卜結連理 甲娘寄留造同居 續落結婚个代志 緊共列位恁通知
下本[编辑]
王珍漢部發行 食大親成着秤彩 不免賢撰等東西 普通面貌我着愛 小妹性情汝所知 驚汝配着不成人 即有延諓二三冬 想來算去不敢放 那不自己去撰尫 大姊志願先發表 嘴甲廣出無校梢 農場一个生巧妙 現部做工在工寮 汝那看了有到重 目周咱着愛認人 是汝終身个秧望 十分定棟咱即通 人才實在有影好 性情生了真平和 小妹現部𤆬返到 遂在大姊汝伐落 小妹汝那有意愛 通知母親伊得知 趕緊𤆬入咱厝內 通乎老母去主裁 是大望汝罩賛成 小妹共汝呼代先 總廣取人个心性 不免好額愛才情 好呆遂在汝打算 心肝愛着想恰長 呌伊入來我皆問 請伊漸坐在廳堂 現部坐治咱大廳 小妹招汝做陣行 來去皆問即知影 叫伊入來是不成 出來大廳擧頭看 大姊歡喜在心肝 失禮慢客無相伴 小妹煎茶栓茶盤 我娘捧茶出來請 先敬人客我親兄 粗茶泡了有恰鹹 不通氣嫌捧去食 來到乎汝足好禮 閣請水仙泡種茶 敷島个煙提來把 專工請我無別个 小妹乎汝真痛疼 實在有影肴做人 青年能知人輕重 感謝汝來罩相邦 無影汝閣肴奧老 令妹做人差不刀 煞工招我罩陣到 受伊好禮無奈何 有來嗎即能熟賽 呆呆所在即能知 總是望汝罩感介 那無做工那有來 遂辨栓來食暗飯 呆呆帶此隔下昏 時間即晏不通返 罕塊幾時到娘門 初到恁兜隻奉待 汝箱使費不敢來 𤆬阮行入房間內 交椅杞棹兩平排 𤆬君行入娘个房 驚熱我娘先開窻 房間門籬無愛放 下昏共君結成双 君仔歡喜笑文文 第一答心娘對君 坐落共娘汝談論 乎娘請茶甲請煙 別人亦無咱即好 尽情个話廣甲無 謹栓眠床乎君倒 卜共親君結尫婆 看甲今冥个情景 小娘待君足尽情 床內伴了真束靜 上床蚊帳軒一平 君仔卜上眠床頂 我娘諒君做頭前 房門皆閉恰堅定 隻未亂着隔壁宮 娘仔真知人輕重 即免亂着隔壁房 巧粧娘仔生明籠 恰君心肝生相仝 我娘扒上眠床頂 乎君汝困在后平 今日汝興我亦興 双人代志隻能成 今日汝愛我亦愛 娘有招君即有來 萍水相逢心色代 月老摧遷做一排 共君做追望君蔭 少年青春最清心 手骨乎君汝做枕 一刻春宵值千金 廣箱徹底我無愛 編歌免廣眾人知 一欵算是風流代 驚人罵我轆下骸 五更僥倖隻緊返 獨身的人嫌冥長 大姊來塊叫食飯 目未一爾天着光 娘仔落床捧面水 手巾提來做一追 煞栓乎君伊洗嘴 呌哥未起足古錐 昨暗乎汝真無榮 無宜娘仔醒代先 齒膏齒敏在棹頂 面水捧在床棹前 嘴洗了后面煞洗 叫娘瓦來接齒杯 禮數用去足成最 君仔戇戇未曉回 等君洗好捧去拼 面水潑在門口庭 請君食粥恰有影 無省菜色通請兄 栓甲四皿過一碗 渫仔肉腐甲肉干 棹頂排別足好看 娘仔一生介肴瀾 此是共君汝換肚 乎君奧老卜如何 恨咱散赤恰艱苦 草地不敢比島都 汝我清粥𫔘食飽 伐落收收入灶脚 七点時間亦真早 諒早出門好行踏 我娘頭棕梳好世 問君卜創省乜个 通好通知咱阿姉 伊是內面塊主家 想卜來去報戶口 卜來寄留娘仔兜 今是有娘做家后 同居搬來做一頭 那卜一欵罵是好 未免我娘人笑無 阮卜共君做陣倒 路中通伴我親哥 入內通知阮大姉 共君卜去造同居 戶口卜創伊賜示 即免外口人堯疑 姉仔听了歡喜代 返到伐落隨時來 汝是我的親妹婿 搬搬歸家合應皆 二人相𤆬就出門 來到君仔伊本庄 厝邊頭尾瓦來問 奧老娘仔生成物 椅棹家施成多隻 君仔去倩貨物車 亦有棹櫃掛大鏡 拜托厝邊來罩夯 貨物个車倩一頓 店號々做マル坤 甲我朋友永無論 車金皆送四圓銀 搬了皆下伊束靜 鏡臺棹櫃下歸平 擦仔皆吊在壁頂 山水伊有入像卿 來去衙門領抄本 一張禀錢二角銀 代志創了隻宿困 時間都免五十分 親君緊去着緊返 不免我娘心頭酸 戶口係長那是問 廣卜寄留娘家門 來到衙門戶口係 管領抄本𫔘一个 近瓦共伊說詳細 乎君拜托不敢提 看伊手來接禀稿 尋即輕快永是無 アリガト汝真好 サヨナラ來𣅄� 戶口抄本領過手 乎娘汝去報寄留 呆呆汝咱罔成受 隻免有頭無尾鰍 提來皆問阮大姉 人伊廣卜報同居 不知汝是省主意 家內是汝塊依持 看伊都是正經人 卜報同居敢不通 是汝終身个秧望 打算敢未想呆空 那甲按哖卜盞樣 遂在大姉恁主張 看伊都是能曉想 代志卜作愛收場 姉妹參詳有一困 無來乎伊報結婚 大家做追永無論 乎伊加用淡薄銀 那甲一欵有同意 來去共伊小通知 代志有終就有始 乎伊加開多少錢 代志卜做尽一拵 呌君出所入結婚 尫某到此就安允 通好通知姉妹群 十姊八妹听一見 歡喜姉妹好佳期 眾人包禮來賀喜 恭賀小妹配君兒 君仔心肝足歡喜 欣善得着好妻兒 通知朋友眾兄弟 吩咐日師看吉時 日師看日𫔘廿七 八月十五上好日 月夜團圓奧塊得 伐落共娘好親成 今日結婚是大禮 吩咐員仔挨恰加 通卜來還眾大家 十親五戚數十个 結婚日止一的到 提禮來恰相爭頭 亦有半埔透中鬪 專用現金包紅包 提來禮數巢收起 籃仔緊皆戴紅員 今日結婚的日止 放帖煞共伊通知 結婚日止一的到 点灯結彩在廳頭 新娘巧粧成禮斗 子婿親淺人緣投 舊式結婚的時代 鼓吹八音鬧猜猜 親成五十滿廳內 奧老新郎好人才 同房花燭佳期夜 下昏開棹請親成 棹頂荖花甲大餅 今日真正好名聲 廳中排棹甲排椅 卜請人客正酉時 棹頂牙箸排落去 四面八枝銀湯匙 排落凸柑甲瓜只 甘蔗芎蕉鬪四渫 一坪肉棗甲蝦箭 二皿皮旦甲猪舌 酒甌排落足好看 棹邊𫔘好八角皿 請恁坐位通擧盞 各位坐位有盖單 吩咐總舖作恰緊 棹頂白鶴汗來藤 今日真正感謝恁 一來請恁二會親 頭碗出來是正燕 總舖肴煑即無烟 請恁列位着隨便 趁燒來食不免諓 二碗出來加里鷄 禮數無敎恰失培 粗粗物件無菜底 請恁閣用第二回 三碗出來冬菜鴨 此碗專無鴨頭脚 粗俗物件食恰飽 燒酒大家飲恰乾 四碗出來是魚莿 有嬌香孤甲肉絲 奉請列位來到止 好呆罔着食止饑 五碗出來是瀨肚 有參松茸甲香孤 自恨總舖變無路 草地所在有恰粗 六碗出來是杏仁 普通作了有巧神 今日初回相見面 燒酒趕緊閣再藤 七碗出來是腰只 配合香孤鷄肉絲 閣來請用免細利 酒來那食那談詞 八碗出來用竪渫 中央一皿五柳枝 恭賀喜酒好代志 乎伊一胎生雙生 九碗出來無菜底 一皿紅燒五全鷄 事實巧妙足肴作 五尖着愛流返回 十碗出來是下水 清湯來食脾恰開 恭賀新娘丁財貴 福祿壽全行相隨 十一出來八寶飯 兩平二碗是清湯 先洗湯匙不免問 飯食了後配甜湯 十二出來清連只 一碗又閣是出甜 恭賀合婚兩大姓 桂子蘭孫團團圓 十三出來是蝦仁 荷仁豆仁好食新 散筵通看新娘面 燒酒汗來閣再藤 十四杏仁作豆腐 用氷過氷未箱須 乎恁閣坐無外久 失禮吾恰短言詞 十五出來是霜棗 霜甜配合卜偶刀 通人食了都奧老 亦有恰好永是無 十六尾出鷄蛋糕 尾碗食了大家無 此欵正正漢席棹 大家隻閣來𣅄�
農場相褒歌終