翻译:惡之華/異國香水

異國香水
作者：夏爾·皮耶·波德萊爾
譯者：木枚

本作品收錄於《惡之華》

當我喺炎熱嘅秋夜閉眼，
吸入你溫暖胸膛嘅芳香，
再睇住快樂嘅海岸延長，
佢被單調陽光照得璀璨。

大自然賜畀呢座慵懶嘅島
奇特嘅樹木同好味嘅果實，
賜下男人，苗條又精力滿溢，
同女人雙目誠懇得叫人失措。

你嘅氣味帶我到迷人國度，
我見到帆同桅喺碼頭滿佈，
畀海浪搞到一副疲容，

青綠羅望子嘅芳香，
縈燒喺空中，令我鼻窿脹腫，
交融我靈魂中水手嘅放聲高唱。