翻译:惡之華/飛昇

飛昇
作者：夏爾·皮耶·波德萊爾
譯者：木枚

本作品收錄於《惡之華》

喺池塘、深谷、高山之上、
越過叢林、白雲、大海、
然後到日光、蒼天之外、
窮盡埋星界嘅邊疆，

我嘅靈魂，你來去自如
好似泳將噉見到水就忘形，
懷住陽剛又難以言喻嘅高興
暢遊喺無垠空間各處。

你要一飛遠離帶毒嘅瘴氣，
喺雲上嘅空氣淨化自我，
再將填滿清澈宇宙嘅明火，
當成神聖嘅酒一嘗滋味。

厭倦加上憂愁滿盈，
如重擔壓喺如霧嘅存有。
有一種人福份優厚:
佢拍單翼就高飛到光明靜謐之境，
思想如雲雀馮虛御風，

衝向朝早嘅青空，
神遊於歲月，就算係繁花種種，
定無聲之物嘅言語，都了然於胸。