翻译:恶之华/夜晚暮色
| ← | 博弈 | 夜晚暮色 作者：夏尔·皮耶·波德莱尔 译者：木枚 |
朝早暮色 |
|
眼前即醉人夜晚，罪恶之友，
似个同伙嚟到，带住豺狼脚步行走。
天空恍如大壁龛缓缓内收，
躁动嘅人化身为野兽。
夜晚啊动人嘅夜晚，为人所欲之物，
佢哋直截了当嘅双臂表达:“今日
我哋都辛苦啦”。就系呢晚安慰
灵魂，佢畀残酷嘅痛苦吞噬;
慰藉智者，佢生性倔强，眉宇凝重;
宽解工人，佢重夺床铺，佝偻身躬。
而遍布喺空气嘅魔鬼凶狠，
缓缓醒转，似事忙嘅贵人，
然后飞起撞击百叶窗同顶篷。
喺畀风摧残嘅光线之中，
娼妓现身于街道巷弄，
好似蚁丘排出自己嘅内笼。
佢哋到处杀出嘅路神秘幽微，
就似敌人嘅试探要攻其不备。
佢喺粪泥之城嘅胸部蠕动，
似条要偷人食紧嘅嘢嘅蛆虫。
四面八方嘅声音:食物滋滋声乱窜、
剧场大嗌、扯鼻鼾嘅交响乐团，
一台台贵客喺赌局纵情声色，
艳女、老千等人马喺其中充斥，
仲有贼仔，无情又不知节制，
佢哋都已经各就其位，
为咗生存多几日同帮情人置装，
要将门窗同宝箱偷偷夹硬开敞。
灵魂啊，喺此时此刻要观照自身，
要对呢阵骚动充耳不闻。
而家系病人痛苦加剧嘅时候!
阴沉之夜捉住佢哋嘅咽喉，
佢哋了结各自命运，走向共同深渊，
叹息声充满病院。
唔止一个冇得再嚟食香浓嘅汤水，
同挚爱嘅人，喺夜晚围住火堆。
但大多数人连温柔嘅炉火
都未体验，佢哋未系真正活过!
