翻译:惡之華/夜晚暮色
| ← | 博弈 | 夜晚暮色 作者：夏爾·皮耶·波德萊爾 譯者：木枚 |
朝早暮色 |
|
眼前即醉人夜晚，罪惡之友，
似個同伙嚟到，帶住豺狼腳步行走。
天空恍如大壁龕緩緩內收，
躁動嘅人化身為野獸。
夜晚啊動人嘅夜晚，為人所欲之物，
佢哋直截了當嘅雙臂表達:「今日
我哋都辛苦啦」。就係呢晚安慰
靈魂，佢畀殘酷嘅痛苦吞噬;
慰藉智者，佢生性倔強，眉宇凝重;
寬解工人，佢重奪床舖，佝僂身躬。
而遍佈喺空氣嘅魔鬼凶狠，
緩緩醒轉，似事忙嘅貴人，
然後飛起撞擊百葉窗同頂篷。
喺畀風摧殘嘅光線之中，
娼妓現身於街道巷弄，
好似蟻丘排出自己嘅內籠。
佢哋到處殺出嘅路神秘幽微，
就似敵人嘅試探要攻其不備。
佢喺糞泥之城嘅胸部蠕動，
似條要偷人食緊嘅嘢嘅蛆蟲。
四面八方嘅聲音:食物滋滋聲亂竄、
劇場大嗌、扯鼻鼾嘅交響樂團，
一枱枱貴客喺賭局縱情聲色，
艷女、老千等人馬喺其中充斥，
仲有賊仔，無情又不知節制，
佢哋都已經各就其位，
為咗生存多幾日同幫情人置裝，
要將門窗同寶箱偷偷夾硬開敞。
靈魂啊，喺此時此刻要觀照自身，
要對呢陣騷動充耳不聞。
而家係病人痛苦加劇嘅時候!
陰沉之夜捉住佢哋嘅咽喉，
佢哋了結各自命運，走向共同深淵，
嘆息聲充滿病院。
唔止一個冇得再嚟食香濃嘅湯水，
同摯愛嘅人，喺夜晚圍住火堆。
但大多數人連溫柔嘅爐火
都未體驗，佢哋未係真正活過!
