翻译:恶之华/碧翠丝

碧翠丝
作者：夏尔·皮耶·波德莱尔
译者：木枚

本作品收录于《Translation:恶之华》

喺尘封焦化荒芜嘅土地，
有一日我向大自然吁唏，
而我嘅思绪，随缘游曳，
慢慢喺心上将匕首砥砺，
日头方中时，我见到自狂风暴雨
有块死荫嘅厚云临我头上之处，
佢有一大班邪恶魔鬼跟住，
好似啲残暴但好奇嘅侏儒。
佢哋冰冷嘅目光向我倾注，
我听到佢哋嘅笑声同耳语，
见到佢哋挤眉弄眼交换暗号，
就似堆路过嘅人尊敬个癫佬。

“一齐静静注视呢幅绘型，
同由哈姆雷特模仿嘅阴影、
优柔寡断嘅眼神仲有随风嘅发丝。
唔觉系人都冇眼睇呢个逸乐之士、
恶棍、游手好闲嘅小丑、笑话，
因为佢识将角色玩得出神入化，
想要用佢嘅痛苦化成歌谣，打动
飞鹰、蟋蟀、河流、花木草丛，
甚至想打动发表过时伟论嘅我哋，
最后朗读背诵，叫满腹经纶横飞?

我嗰阵可以(我高过山嘅高傲
支配住恶魔嘅集团及其呼号)
就啖拧转我无上嘅头视若无睹，
如果冇喺个淫秽嘅团伙度睇到
佢哋冇令太阳窒碍之娼狂!
眼神独特，统驭我心嘅女王，
同佢哋耻笑我阴郁嘅悲怆，
有时仲摸佢哋摸得好淫荡。