翻譯:惡之華/燈塔

燈塔
作者：夏爾·皮耶·波德萊爾
譯者：木枚

本作品收錄於《Translation:惡之華》

魯本斯如遺忘之河、怠惰之園、
清新血肉嘅溫床，嗰度人冇得相愛，
但生命可以流淌迴轉唔間斷，
如蒼穹嘅空氣，如海中之海。

達文西如深邃陰鬱嘅鏡，
迷人又帶笑嘅天使非常神秘，
佢現身處之上係松樹同冰川之嶺，
劃起佢哋國度嘅領地。

林布蘭如悲傷嘅病院，呢喃瀰漫，
唯一嘅裝飾係巨大嘅十字架，
哭禱散發住惡臭似食物腐爛，
冬日照入，但只係一剎那。

米開朗基羅之境如坐五里霧中，
睇嘅人會將海格力斯當做耶穌，
暮光中高大直立嘅鬼影幢幢，
伸手就要撕碎佢哋嘅裹屍布。

拳手嘅怒氣、百獸嘅魯莽、
識得喺大俗發現大雅嘅你、
自滿嘅雄心、愚人嘅槁黃，
裴節，統領罪犯嘅人中騏驥。

華托如節慶，耀眼嘅心如蝶，
閃爍飛舞，誤入歧途。
擺設新淨精巧，光下生燁，
將瘋狂向兜兜轉轉嘅舞會傾倒。

戈雅如夢魘，充斥未知、
充斥喺女巫聚會煮熟嘅胚胎、
照鏡嘅阿婆、一絲不掛嘅小兒，
著好絲襪，想令魔鬼翹首盼待。

多拉夸如血湖，被撒旦縈繞，
仲有長青嘅松樹庇蔭，
鋪天哀傷下，外邦嘅號角裊裊，
好似韋伯嘅嘆息難以自噤。

呢啲詛咒、褻瀆、呻吟、
呢啲法喜、呼喊、眼淚、聖言
都係由千個迷宮復誦嘅回音，
亦係畀凡人之心嘅神聖鴉片。

呢聲叫喊畀千個哨站重覆，
呢個律令畀千個大聲公傳誦，
萬千堡壘頂上，個燈塔燃起光燭，
呢聲召喚，隨獵手沒於林影重重!

主啊，呢個以我哋嘅名聲
已經係負擔到最好嘅見證:
喺時代洪流，呢聲痛哭無法安靜，
但會湮沒喺你永恆之境。