翻译:惡之華/哀傷同浪蕩
| ← | 致殖民地嘅某女士 | 哀傷同浪蕩 作者：夏爾·皮耶·波德萊爾 譯者：木枚 |
貓 |
|
阿加特，你嘅心係咪有時會起飛
遠離污穢城市嘅黑色海洋，
去到另一個海，嗰度光彩明熙，
好似童貞咁蒼藍、澄明、同深長?
阿加特，你嘅心係咪有時會起飛?
海，無邊嘅海，將我哋嘅勞累撫揉!
怒號狂風嘅管風琴伴奏，
邊個魔鬼鍾情海呢個沙聲嘅歌手
又將搖籃般嘅崇高能耐向佢賜授?
海，無邊嘅海，將我哋嘅勞累撫揉!
馬車，送我一程!戰艦，請帶我走!
高飛遠走!我哋嘅淚誕自泥污!
阿加特憂傷嘅心係咪有時會開口:
「遠離悔恨、罪惡同痛苦，
馬車，送我一程，戰艦，請帶我走?」
翠海香天，你離我好遙遠，
喺你嘅蒼藍底下只有情愛同快活
一切被愛嘅都值得被眷戀，
人心都畀純粹嘅狂喜淹沒!
翠海香天，你離我好遙遠!
但兩小無猜嘅碧綠樂園，
悠遊、唱和、親吻、花束
小提琴聲響自山嶺後端，
夜晚伴隨金樽同草木，
但兩小無猜嘅碧綠樂園，
無邪樂園，充滿短暫快樂，
係咪仲遠過印度同中國?
我哋可以用哀叫令佢回溯，
以銀鈴般嘅聲線將佢重新活絡，
嗰個無邪樂園充滿短暫快樂?
