翻譯:惡之華/自戕之人

自戕之人
作者：夏爾·皮耶·波德萊爾
譯者：木枚

本作品收錄於《Translation:惡之華》

給 J.G.F.
我會打你，不帶怒焰，
不帶仇恨，似屠者，
似摩西將石頭大卸，
我會令你眼瞼

噴出痛苦嘅水
去灌溉我嘅撒哈拉，
我嘅慾望因希望而脹大，
喺你鹹鹹淚水游嚟游去，

似隻船準備開赴，
喺我會畀佢哋迷醉嘅心，
有你矜貴嘅啜泣回音，
似奏行進曲嘅鼓!

多得反諷夠貪心，
佢解救我又食我嘅肉，
噉我仲唔係神聖交響曲
入邊嘅不協和音?

個潑婦身處喺我聲線!
隻黑毒液都係我血嘅成果!
我係一塊畀癲婆
用嚟照嘅邪惡鏡面。

我係傷口亦係劍鉤!
我係吐息又係面目!
我係四肢又係車轆，
係犧牲者又係劊子手!

我係我內心嘅吸血鬼，
—亦係其中一個被遺棄喺
命定嘅大笑直到永世，
但要再微笑卻力有不逮。