翻译:惡之華/我鍾意追憶呢啲赤裸嘅年代

我鍾意追憶呢啲赤裸嘅年代
作者：夏爾·皮耶·波德萊爾
譯者：木枚

本作品收錄於《Translation:惡之華》

我鍾意追憶呢啲赤裸嘅年代，
阿波羅樂意喺雕像鍍上金彩。
男女輕易交歡，
無憂亦唔相瞞。
上天愛撫佢背脊嘅肌理，
活絡下呢部高貴嘅機器。
西貝利不吝賜下佢嘅纍纍果實，
唔覺得佢子孫係件累贅嘅事物。
但母狼心廣，佢嘅愛個個都有，
佢啡色嘅乳頭餵哺全宇宙。
君子剛強壯膽，憑風采稱王
配得起洋洋得意嘅輕狂。
果子完好，未招鐮刀亂斬，
肉飽質滑，更引獠牙大啖!

詩人喺此時此際，
正畀幽暗嘅寒意包圍，
想像緊盤古開天時嘅宏偉，
嗰陣男女仲係赤身露體。
如此陰森嘅景象驚世駭俗。
噉嘅打扮叫惡徒都哀哭!
咁可笑嘅肉體，都係搵塊布遮一遮，
瘦弱又巖巉，贅肉生得狂野，
畀全能、堅定又沉著嘅神
趁佢仲細，用青銅嘅襁褓包緊。
你班女人面如白蠟，未識魚水之歡，
卻因放蕩而消瘦同豐滿，
其醜惡同血緣，
借母親嘅惡意代代相傳。

墮落嘅子民，我同你哋講件真事
我哋有種美係古老嘅民族唔知:
潰爛嘅內心將五官凌遲，
好似慵懶之為美嘅標誌。
遲鈍嘅繆斯腦入邊嘅子虛烏有，
唔可以將呢個種族嘅病態驅走，
佢哋對青春，神聖嘅青春深深致敬，
態度朴實，眉宇間帶柔情，
雙眼晶瑩透澈，如流水
覆蓋地上萬物。無憂無慮
如藍天、如飛鳥、如嫣紅姹紫
如其芬芳、其歌喉、其溫柔暖意。